რომის პაპის დესპანი, მატეო ძუპი უკრაინაში ომის შეწყვეტის ხელშეწყობის დიპლომატიური მისიით, ჩინეთში გაემგზავრება. ინფორმაციას იტალიური გაზეთი La Repubblica ავრცელებს.
გამოცემის ინფორმაციით, მოსალოდნელია, რომ პეკინში მატეო ძუპი მაღალი დონის შეხვედრებს გამართავს, მათ შორის პრემიერ-მინისტრს, ლი ციანს, შეხვდება.
შეგახსენებთ, რომ უკრაინასა და რუსეთს შორის მშვიდობის მიღწევის საკითხში ვატიკანის ძალისხმევის ფარგლებში, რომის პაპის დესპანი ივნისში კიევსა და მოსკოვს ეწვია, ხოლო ივლისში - ვაშინგტონში ჩავიდა, სადაც აშშ-ს პრეზიდენტს, ჯო ბაიდენს შეხვდა. ვატიკანი ასევე რუსეთის მიერ დეპორტირებული უკრაინელი ბავშვების სამშობლოში დაბრუნების მექანიზმზე მუშაობას განაგრძობს.