უნგრეთის სოფლის მეურნეობის მინისტრი აცხადებს, რომ რუმინელ, ბულგარელ და სლოვაკ კოლეგებთან უკრაინული აგროპროდუქციის იმპორტზე აკრძალვას შენარჩუნებაზე შეთანხმებას მიაღწია
უნგრეთის სოფლის მეურნეობის მინისტრის, იშტვან ნადის განცხადებით, მან თავის რუმინელ, ბულგარელ და სლოვაკ კოლეგებთან მიაღწია შეთანხმებას იმის შესახებ, რომ აღნიშნული ქვეყნები უკრაინული აგროპროდუქციის იმპორტზე მოქმედ აკრძალვას შეინარჩუნებენ, თუ ამას ევროკომისია არ გააკეთებს.
ინფორმაციას იშტვან ნადის განცხადებაზე დაყრდნობით, უნგრული გაზეთი Portfolio აქვეყნებს.
მინისტრმა აღნიშნა, რომ უკრაინული საქონლის ჩამონათვალი, რომლის შემოტანაზე აკრძალვა გავრცელდება, შეიძლება გაფართოვდეს.
"მოველაპარაკეთ რუმინელ, ბულგარელ და სლოვაკ კოლეგებს იმის შესახებ, რომ, თუ ბრიუსელმა მორატორიუმის ვადის გაგრძელება შესახებ გადაწყვეტილება არ მიიღო, ჩვენ ინდივიდუალურად ვიმოქმედებთ, ჩვენი ეროვნული კომპეტენციის ფარგლებში", - განაცხადა ნადიმ.
ამასთან, ევროკომისიაში, ასევე, შევიდა წინადადება უკრაინული აგროპროდუქციის ცალკეული სახეობების იმპორტზე დროებითი აკრძალვის გაგრძელების შესახებ 15 სექტემბრის შემდეგაც, როგორც ამას პოლონეთი და უნგრეთი ითხოვენ.
წინადადება ვაჭრობის საკითხებში ევროკომისრის ოფისის ხელმძღვანელმა, მიხაელ გეგერმა შეიტანა.
„წინადადება საბაზრო ვითარების ანალიზზე არის დაფუძნებული: დაბალი ფასები, მარცვლეულის შენახვის შეუძლებლობა უკრაინის მეზობელი ქვეყნების ტერიტორიაზე და ევროკავშირის სხვა ქვეყნებში უკრაინული ექსპორტის ზრდა“, - ნათქვამია გავრცელებულ ინფორმაციაში.
ჯერჯერობით უცნობია, საუბარია შეზღუდვების გაგრძელებაზე მიმდინარე წლის ბოლომდე თუ უფრო მოკლე ვადით.
გამოცემა აღნიშნავს, რომ გადაწყვეტილება ევროკომისიის პრეზიდენტ, ურსულა ფონ დერ ლაიენზე არის დამოკიდებული, მაგრამ ეს შეიძლება აკრძალვის სასარგებლოდ სიგნალი გახდეს.
