უკრაინის თავდაცვის მინისტრი, რუსტემ უმეროვი კიევში ბრიტანელ კოლეგას, გრანტ შაპსს შეხვდა, - ამის შესახებ უმეროვი სოციალურ ქსელში წერს.
მისი ინფორმაციით, შეხვედრაზე ისაუბრეს საჰაერო თავდაცვის, საარტილერიო და დრონების საწინააღმდეგო სისტემებთან დაკავშირებით უკრაინის მოთხოვნაზე.
„ზამთარი გვიახლოვდება, მაგრამ ჩვენ მზად ვართ - ერთად უფრო ძლიერები“, - აცხადებს უმეროვი.
მისი თქმით, ბრიტანელ კოლეგას მიაწოდა ინფორმაცია სამხრეთ-აღმოსავლეთ უკრაინაში კონტრშეტევის მცდელობებში კიევის პროგრესის შესახებ.
შეგახსენებთ, გაერთიანებული სამეფოს თავდაცვის ახალი მინისტრი, გრანტ შაპსი ოფიციალური ვიზიტით კიევში ჩავიდა. ვიზიტის ფარგლებში მინისტრი უკრაინის პრეზიდენტ ვოლოდიმირ ზელენსკის შეხვდა.