ანდრეი ერმაკსა და ჯეიკ სალივანს შორის სატელეფონო საუბარი შედგა, სადაც მხარეებმა ფრონტის ხაზზე არსებული ვითარება, რუსული დრონების თავდასხმები, ასევე, უკრაინის თავდაცვისა და იარაღის ერთობლივი წარმოების საკითხები განიხილეს.

უკრაინის პრეზიდენტის ადმინისტრაციის ხელმძღვანელმა ანდრეი ერმაკმა ეროვნული უსაფრთხოების საკითხებში აშშ-ის პრეზიდენტის მრჩეველ ჯეიკ სალივანს სატელეფონო საუბრისას ფრონტის ხაზზე განვითარებული მოვლენები გააცნო.

ასევე, მათი საუბარი შეეხო ირანული დრონების გამოყენებით ბოლოდროინდელ რუსულ საჰაერო თავდასხმებს უკრაინის ინფრასტრუქტურულ ობიექტებზე.

ერმაკმა და სალივანმა უკრაინის პრეზიდენტის, ვოლოდიმირ ზელენსკის შტატებში ბოლო წარმატებული ვიზიტის შედეგები შეაჯამეს. კერძოდ, მათ განიხილეს იარაღის ერთობლივი წარმოების გეგმა.

საუბრისას ერმაკმა მადლიერება გამოხატა აშშ-ის პრეზიდენტის ჯო ბაიდენის, აშშ-ის კონგრესისა და ამერიკელი ხალხის იმ მხარდაჭერის მიმართ, რომელსაც უკრაინა გრძნობს.