გერმანია უკრაინას, მარცვლეულის ტვირთების დასაცავად, საჰაერო თავდაცვის საშუალებებს გადასცემს

გერმანია უკრაინას, მარცვლეულის ტვირთების დასაცავად, საჰაერო თავდაცვის საშუალებებს გადასცემს

გერმანია უკრაინას შავი ზღვისა და დუნაის პორტების დასაცავად, რომლებითაც მარცვლეულის ექსპორტი ხორციელდება, საჰაერო თავდაცვის სისტემებს გადასცემს, - ინფორმაციას Bloomberg-ი ავრცელებს.

გამოცემის ცნობით, ქვეყანა გეგმავს უკრაინას საჰაერო თავდაცვის სისტემა IRIS-T-ი და 12-ზე მეტი საზენიტო დანადგარი Gepard-ი გადასცეს. ამ საშუალებებმა უკრაინის სამხრეთ სანაპიროზე რუმინეთისაკენ მიმავალი ტვირთების დაცვა უნდა უზრუნველყოს.

გავრცელებული ინფორმაციით, იარაღის უკრაინაში გაგზავნა მიმდინარე წლის ბოლომდე იგეგმება.

უკრაინაში დამატებითი IRIS-T სისტემისა და Gepard-ის საზენიტო თვითმავალი დანადგარების გაგზავნის შესახებ ინფორმაცია გერმანელმა დეპუტატმა, პარლამენტის ქვედა პალატის თავდაცვის კომიტეტის წევრმა, მარკუს ფაბერმაც დაადასტურა.

„უკრაინა გამოიყენებს ამ სისტემებს, მაგალითად, მარცვლეულის პორტების უკეთ დასაცავად“, - აღნიშნა მან.