ბენიამინ ნეთანიაჰუ - ღაზაში დარტყმები მხოლოდ დასაწყისია - ეს ომი გვაიძულა საზიზღარმა მტერმა, მხეცებმა - ჩვენ ყოველთვის ვიცოდით, რა არის „ჰამასი“, ახლა კი მთელმა მსოფლიომ იცის: ჰამასი არის ISIS-ი
ისრაელის პრემიერ-მინისტრმა ბენიამინ ნეთანიაჰუმ მოსახლეობას მიმართა და განაცხადა, რომ ისრაელი ომშია საკუთარი არსებობის უზრუნველსაყოფად და რომ სისასტიკეს, რომელსაც „ჰამასი“ ახორციელებს, ISIS-ის [ისლამური სახელმწიფო] შემდეგ არ უნახავთ.
”ჩვენ ვართ ოპერაციაში სახლისთვის, ეს არის ომი ჩვენი არსებობის უზრუნველსაყოფად, ომი, რომელშიც ჩვენ გავიმარჯვებთ.
ეს ომი გვაიძულა საზიზღარმა მტერმა - მხეცებმა, რომლებიც ქალების, ბავშვების და მოხუცების მკვლელობებს ზეიმობენ“, - განაცხადა ნეთამიაჰუმ.
ისრაელის პრემიერმა ისაუბრა "ჰამასის" სისასტიკეზე.
"ოჯახებთან ერთად შეკრული და სიკვდილით დასჯილი ბავშვები, ზურგში დახვრეტილი ახალგაზრდა გოგონები და ბიჭები“, - განაცხადა მან და დასძინა:
„ჩვენ ყოველთვის ვიცოდით, რა არის „ჰამასი“. ახლა მთელმა მსოფლიომ იცის. ჰამასი არის ISIS-ი. ...და ჩვენ დავამარცხებთ ზუსტად ისე, როგორც განვითარებულმა სამყარომ დაამარცხა ISIS-ი.”
სიტყვით გამოსვლისას მან აღნიშნა, რომ ღაზაში საჰაერო თავდასხმები "მხოლოდ დასაწყისია", ამასთან ნეთანიაჰუს თქმით, "ყველაფერს გააკეთებენ ტყვედ მყოფი ისრაელელებისთვის".
მან ასევე მოუწოდა ოპოზიციურ პარტიებს, შექმნან ფართო კოალიციური მთავრობა.
