ლევან დავითაშვილმა რკინიგზელებს პროფესიული დღე მიულოცა

ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა საქართველოს რკინიგზელებს პროფესიული დღე მიულოცა. ინფორმაციას ეკონომიკისა და მდგრადი განვითარების სამინისტრო ავრცელებს.

„10 ოქტომბერი რკინიგზელის დღეა. მინდა მივულოცო საქართველოს რკინიგზის ყველა მოქმედ და ყოფილ თანამშრომელს პროფესიული დღე, ვუსურვო ჯანმრთელობა და გაწეული საქმიანობისთვის მადლობა ვუთხრა.

ზუსტად 151 წლის წინ, ფოთიდან თბილისის მიმართულებით პირველი სატვირთო - სამგზავრო მატარებელი დაიძრა. ამ დღიდან მოყოლებული, საქართველოს რკინიგზას თავისი წვლილი შეაქვს საქართველოს ეკონომიკის განვითარებაში. 2022 წელს, წინა წელთან შედარებით, რკინიგზით 21.8%-ით მეტი ტვირთის ტრანსპორტირება განხორციელდა. განსაკუთრებით მზარდია დინამიკა საკონტეინერო გადაზიდვებში - 2022 წელს ეს მაჩვენებელი 19.1%-ით, 2023 წლის იანვარი - აგვისტოს პერიოდში კი 17.8%-ით გაიზარდა.

ტვირთნაკადების ზრდის ფონზე, სარკინიგზო ინფრასტრუქტურის განვითარება კიდევ უფრო მნიშვნელოვანია. 2024 წლისთვის საქართველოს რკინიგზის მოდერნიზაციის პროექტის დასრულება იგეგმება, რის შედეგადაც ტრანსპორტირების დრო და ხარჯები შემცირდება, გაიზრდება სარკინიგზო მიმოსვლის უსაფრთხოების დონე, ხოლო წლიური სატვირთო გამტარუნარიანობა 28 მლნ ტონიდან 48 მლნ ტონამდე გაიზრდება.

გარდა ამისა, მიმდინარე წელს ჩვენ სარკინიგზო ტრანსპორტის დარგში მნიშვნელოვანი რეფორმა დავიწყეთ, რაც ამ დარგში თანამედროვე, ევროპული ინსტიტუციური და სამართლებრივი ჩარჩოს ფორმირებას გულისხმობს. მისი განხორციელების შედეგად, სარკინიგზო ტრანსპორტის ეფექტურობა და კონკურენტუნარიანობა მნიშვნელოვნად ამაღლდება.

რკინიგზის წარმატებისთვის განსაკუთრებული მადლობა მინდა ვუთხრა კომპანიის 11,000-ზე მეტ თანამშრომელს, რომლებიც ყოველდღე, 24 საათის განმავლობაში, საქართველოს რკინიგზის განვითარებისთვის მუშაობენ. ამით თავიანთი წვლილი შეაქვთ ჩვენი ქვეყნის ერთ-ერთი მთავარი ფუნქციის - სატრანსპორტო დერეფნის გამართულ ფუნქციონირებაში”, - ნათქვამია მილოცვაში.

გიორგი გობრონიძე - ხელისუფლება საზოგადოებასთან ბოლომდე გულწრფელი არ არის
ქართული პრესის მიმოხილვა 22.07.2024
კახეთის გზატკეცილზე „კარფურის” სუპერმარკეტი უკვე გაიხსნა
„ბიოგრაფი ლივინგი“ დეველოპერულ ბაზარზე მოღვაწეობის პირველივე წლის ბოლოს მე-4 ახალ პროექტს იწყებს
Keepz-მა ღია ბანკინგის ლიცენზია მიიღო