აშშ-ის სახელმწიფო მდივანი, ენტონი ბლინკენი ისრაელის საგარეო საქმეთა მინისტრს, ელი კოენს ტელეფონით ესაუბრა და ისრაელის მიმართ აშშ-ის მხარდაჭერა კიდევ ერთხელ დაადასტურა.

„ვესაუბრე ისრაელის საგარეო საქმეთა მინისტრს, ელი კოენს იმის შესახებ, თუ როგორ უჭერს მხარს აშშ ისრაელს, რომელიც „ჰამასის“ ტერორისტული თავდასხმისგან იცავს თავს და დავადასტურე მცდელობები ყველა მძევლის დაუყოვნებლივ გათავისუფლების უზრუნველსაყოფად“, - წერს ბლინკენი სოციალურ ქსელში.

მისივე ინფორმაციით, ახლო აღმოსავლეთში განვითარებულ მოვლენებთან დაკავშირებით საფრანგეთის საგარეო საქმეთა მინისტრს, კატრინ კოლონასაც ესაუბრა.

„ვესაუბრე კატრინ კოლონას ისრაელზე „ჰამასის“ ტერორისტული თავდასხმებისა და „ჰამასის“ ძალადობაზე რეაგირების გაგრძელებასთან დაკავშირებით. ისრაელს უფლება აქვს, დაიცვას თავისი მოქალაქეები ამ თავდასხმებისგან და უზრუნველყოს მძევლების გათავისუფლება“, - აცხადებს ბლინკენი.