ხელის გულზე დევს კონსტიტუციის დარღვევა. ამის არდადგენა სამართლებრივად გააჩენს კითხვას არამხოლოდ ჩვენი, ნებისმიერი იურისტის მხრიდან - მათ (მოსამართლეებმა) უნდა იხელმძღვანელონ საქართველოს კონსტიტუციის შესაბამისად, თუ ასე იხელმძღვანელებენ, სახეზეა კონსტიტუციის დარღვევა, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა განაცხადა.

ამასთან, ოხანაშვილის თქმით, ყურადღება მისაქცევია, რომ პრეზიდენტს სასამართლოზე არ წარმოადგენდნენ კონსტიტუციონალისტები და თუ სამართლებრივად სწორი იყო პრეზიდენტის პოზიცია, ოხანაშვილისთვის გაუგებარია, როგორ შეიძლებოდა კარგ კონსტიტუციონალისტს მისი ინტერესები არ დაეცვა. რაც შეეხება პრეზიდენტის წარმომადგენლებს, „იქ გამოჩნდა, რომ არც ერთი იყო კონსტიტუციონალისტი და არც მეორე“.

„არავითარი არგუმენტი არ ჰქონდათ, საკითხის მნიშვნელობა რომ დაეკნინებინათ. ის, რაც განხილვას არ უნდა დაქვემდებარებოდა, იმ საკითხებზე გადაჰქონდათ ყურადღება. ეს იყო მარტივი სამართლებრივი კაზუსი, თუმცა, კი ბატონო, საჭირო იყო განხილვა, ჩვენ დავრჩით ბოლომდე, ყველა შეკითხვას ვუპასუხეთ - მათ შეკითხვებს, საკონსტიტუციო სასამართლოს შეკითხვებს. რა თქმა უნდა, მოლოდინი არის, რომ ადგილი ჰქონდა კონსტიტუციის დარღვევას და ეს უნდა დადგინდეს,“ - განაცხადა ოხანაშვილმა.