საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარე, დავით ნარმანია განახლებადი ენერგიის წყაროს - 500 კვტ სიმძლავრის ელექტროსადგურის გახსნის ღონისძიებას დაესწრო. შესაბამის ინფორმაციას საქართველოს ენერგეტიკისა და წყალმომარაგების მარეგულირებელი ეროვნული კომისია ავრცელებს.

მათივე ცნობით, საპილოტე პროექტი USAID-ის ენერგეტიკული მომავლის უზრუნველყოფის პროგრამისა და შპს „ფუდსერვისის“ მიერ ერთობლივად განხორციელდა.

„სემეკი განახლებადი ენერგიის წყაროებზე მომუშავე სადგურების განვითარებას საქართველოში მხარს უჭერს. ამ კუთხითაც მისასალმებელია USAID-ის როლი, რადგანაც USAID-ის ენერგეტიკული მომავლის უზრუნველყოფის პროგრამის მხარდაჭერით საქართველოში არაერთი მიკროსიმძლავრის ელექტროსადგური დამონტაჟდა. აღსანიშნავია, რომ 2016 წლიდან სემეკის ინიციატივით დაინერგა და საკმაოდ ეფექტიანად მოქმედებს ნეტო-აღრიცხვის პროგრამა, რომელიც ერთ-ერთი პოპულარული წამახალისებელი ინსტრუმენტია მიკროსიმძლავრის ელექტროსადგურების მიმართულებით. სწორად, განახლებადი ენერგიების ათვისების წახალისების მიზნით, ნეტო-აღრიცხვის სისტემაში ჩართული სადგურების დადგმული სიმძლავრე 500 კვტ-ამდე გავზარდეთ. ბოლო მონაცემების შესაბამისად, სისტემაში ჩართული 500 კვტ-ამდე სადგურების დადგმული ჯამური სიმძლავრე 57 მეგავატს აღემატება“, - აღნიშნა დავით ნარმანიამ.

გავრცელებული ინფორმაციის თანახმად, USAID-ის ენერგეტიკული მომავლის უზრუნველყოფის პროგრამა საქართველოში, საპილოტე პროექტების ინიცირებით განახლებადი ენერგიის წყაროების განვითარებაში ტექნიკურ და მატერიალურ დახმარებას უწევს კერძო სექტორის წარმომადგენლებს, რაც თავის მხრივ, ხელს უწყობს საქართველოს ეკონომიკის სხვადასხვა დარგების განვითარებას.