არ ვიცი, ახლა ამაზე რამდენად სწორია მე გავაკეთო განმარტებები, დედაქალაქის მერმა ფონდის მიერ განხორციელებულ რაღაც ქმედებებზე, არ იქნება სწორი, - ასე გამოეხმაურა „ქართული ოცნების“ გენერალური მდივანი, კახა კალაძე ირაკლი აბესაძის მიერ გავრცელებულ ინფორმაციას, რომ „ქართუ ფონდმა“ ყოფილი იპოდრომის ტერიტორია საკუთრებაში დაიბრუნა.

მისივე თქმით, იპოდრომის ტერიტორია არის მუნიციპალიტეტის, სადაც ბიძინა ივანიშვილი ხარჯავს საკუთარ თანხას, რომ იქ მოეწყოს პარკი და გაჩნდეს ლამაზი სივრცე.

„არ ვიცი, ახლა ამაზე რამდენად სწორია მე გავაკეთო განმარტებები დედაქალაქის მერმა, ფონდის მიერ განხორციელებულ რაღაც ქმედებებზე, არ იქნება სწორი. რაც შეეხება იპოდრომის ტერიტორიას ეს არის მუნიციპალიტეტის, სადაც საქველმოქმედო ფონდი „ქართუ“, ამასთან დაკავშირებით არა ერთი განცხადება გაკეთდა, ბიძინა ივანიშვილი ხარჯავს საკუთარ თანხას, რომ იქ მოეწყოს პარკი და გაჩნდეს ლამაზი სივრცე იმისთვის, რომ ადამიანებს ჰქონდეთ შესაძლებლობა დასვენების, გართობის, განტვირთვის, ეს იქნება ცენტრალური პარკი, რომელიც პროექტის სახით იქნება განხორციელებული“, - განაცხადა კალაძემ.

კითხვაზე, ამ დრომდე ფონდ „ქართუს“ ტრანზაქციები ხელმისაწვდომი არ არის, რაზეც კალაძე ამბობს, რომ საქველმოქმედო „ფონდი ქართუ“ არის აბსოლუტურად ღია და გამჭვირვალე.

„თქვენ თუ მიმართავთ ფონდს, დარწმუნებული ვარ, ყველა თქვენს კითხვაზე გექნებათ შესაბამისი პასუხი. საქველმოქმედო „ფონდი ქართუ“ არის აბსოლუტურად ღია და გამჭვირვალე. აღნიშნულმა ფონდმა უამრავი პროექტი განახორციელა მთელი წლების განმავლობაში, ეს იყო სკოლების აღდგენა, რეაბილიტაცია, კულტურული მემკვიდრეობის ძეგლების განახლება-მოწესრიგება, რომელიც უმძიმეს მდგომარეობაში იყო, ჯარის მხარდამჭერი პროგრამები, რომელი ერთი ჩამოვთვალო, ძალიან შორს წავალთ, ყველა იმ განხორციელებულ პროექტზე, რომ ვისაუბრო. თუ არ ვცდები, 6 მილიარდი დოლარის ქველმოქმედება აქვს განხორციელებული აღნიშნულ ფონდს. შესაბამისად, ჩვენ მადლობის მეტი რა გვეთქმის, ასეთი ადამიანები, ასეთი ფონდები ბევრი უნდა იყოს, ვინც ქვეყანას დაეხმარება, ვინც ხალხს დაეხმარება და ხელს შეუწყობს სახელმწიფოს განვითარებაში და ხელს შეუწყობს ისეთი პროექტების განხორციელებაში, რომელიც მათ აქვთ გაკეთებული“, - განაცხადა კალაძემ.

ცნობისთვის, ოპოზიციონერი პოლიტიკოსის, ირაკლი აბესაძის ინფორმაციით, „ქართუ ფონდმა“ ყოფილი იპოდრომის ტერიტორია საკუთრებაში დაიბრუნა.

ამასთან, როგორც აბესაძე სოციალურ ქსელში წერს, „ქართუ ფონდმა“ წინასწარი ნასყიდობის ხელშეკრულება გააუქმა „ლაგუნა ვერესა“ და ყოფილი აბრეშუმის ფაბრიკასთან დაკავშირებით.