განათლებისა და მეცნიერების მინისტრმა, გიორგი ამილახვარმა სან დიეგოს სახელმწიფო უნივერსიტეტი-საქართველოს სტუდენტებთან შეხვედრა გამართა და მათთან უმაღლესი განათლების მიმართულებით დაგეგმილი ინიციატივები, მიმდინარე პროექტები და სამომავლო გეგმები განიხილა.

ამის შესახებ ინფორმაციას განათლების სამინისტრო ავრცელებს.

მათივე ცნობით, მინისტრმა ამერიკის შეერთებული შტატების მთავრობას, ათასწლეულის გამოწვევის კორპორაციასა და სან დიეგოს სახელმწიფო უნივერსიტეტ-საქართველოს მხარდაჭერისთვის მადლობა გადაუხადა.

როგორც მან აღნიშნა, საქართველოსა და SDSU-ს შორის არსებული მრავალწლიანი ნაყოფიერი თანამშრომლობა და 500-ზე მეტი კურსდამთავრებული მართლაც წარმატებული პარტნიორობის თვალსაჩინო მაგალითია.

„შეხვედრა კითხვა-პასუხის რეჟიმში წარიმართა და სტუდენტებს შესაძლებლობა ჰქონდათ მათთვის აქტუალურ საკითხებზე უშუალოდ მინისტრისგან მიეღოთ ინფორმაცია.

სტუდენტებთან შეხვედრაში მონაწილეობა მიიღეს სან დიეგოს უნივერსიტეტის გლობალ-კამპუსის დეკანმა იან გიბსონმა, SDSU-საქართველოს დეკანმა ჰალილ გუვენმა და ილიას სახელმწიფო უნივერსიტეტის რექტორმა, ნინო დობორჯგინიძემ.

საქართველოს მთავრობისა და სან-დიეგოს სახელმწიფო უნივერსიტეტი-საქართველოს პარტნიორობის ფარგლებში, სან დიეგოს სახელმწიფო უნივერსიტეტი საქართველოს სტუდენტებს სთავაზობს მაღალი ხარისხის, ამერიკის ინჟინერიისა და ტექნოლოგიების სააკრედიტაციო საბჭოს (ABET) მიერ აკრედიტებულ ამერიკულ საბაკალავრო პროგრამებს საბუნებისმეტყველო-საინჟინრო (STEM) დარგებში. აღნიშნული პროგრამები საქართველოს სამ სახელმწიფო უნივერსიტეტთან თანამშრომლობით ხორციელდება, ესენია: ივანე ჯავახიშვილის სახელობის თბილისის სახელმწიფო უნივერსიტეტი, ილიას სახელმწიფო უნივერსიტეტი და საქართველოს ტექნიკური უნივერსიტეტი“, - ნათქვამია უწყების მიერ გავრცელებულ ინფორმაციაში.