ღვინის ეროვნული სააგენტოს მხარდაჭერით, დიდ ბრიტანეთში ქართული ღვინის ფესტივალი გაიმართა
ქართული ღვინის ფესტივალს, სამი დღის განმავლობაში, დევონის საგრაფო, დარტინგტონის სასახლე მასპინძლობდა. ინფორმაციას ღვინის ეროვნული სააგენტო ავრცელებს.
მათივე ცნობით, ღონისძიება ღვინის ეროვნული სააგენტოს მხარდაჭერით და სააგენტოს კონტრაქტორი კომპანიის ,,Swirl Wine Group“ ორგანიზებით გაიმართა.
„ფესტივალის ფარგლებში, 20 ქართული ღვინის მწარმოებელი კომპანიის 100-ამდე სხვადასხვა ღვინო იყო წარმოდგენილი. ქართული ღვინის წარდგენას, რომელსაც ღვინის მაგისტრები საარ ებოტი (Sarah Abbott) და ჯასტინ ჰოვარდ სნიდი (Justin Howard Sneyd) უძღვებოდნენ, ღვინის პროფესიონალები დაესწრნენ.
ღონისძიება დიდი ბრიტანეთის ბაზარზე ქართული ღვინის პოპულარიზაციისა და ცნობადობის ზრდის ხელშეწყობას ისახავდა მიზნად, რაც ახალი სავაჭრო პარტნიორების მოძიებისა და ექსპორტის ზრდისთვის მნიშვნელოვანია.
ფესტივალის ფარგლებში, ქართული ტრადიციული სამზარეულოც იყო წარმოდგენილი.
აღსანიშნავია, რომ დიდი ბრიტანეთი ქართული ღვინის ერთ-ერთი სტრატეგიული საექსპორტო ბაზარია. შესაბამისად, ღვინის ეროვნული სააგენტოს ფინანსური და ორგანიზაციული მხარდაჭერით, სხვადასხვა მარკეტინგული ღონისძიება აქტიურად ხორციელდება“,-აღნიშნულია გავრცელებულ ინფორმაციაში.
