„ევროპელი დემოკრატების“ ლიდერები ევროკომისიაში შეხვედრებს მართავენ
„ევროპელი დემოკრატების“ თავმჯდომარე პაატა დავითაია, გენერალური მდივანი მამუკა გამყრელიძე და პოლიტიკური საბჭოს თავმჯდომარე ნიკოლოზ ვაშაკიძე ევროკომისიაში შეხვედრებს მართავენ.
ამის შესახებ ინფორმაციას „ევროპელი დემოკრატები“ ავრცელებს.
მათივე ცნობით, 19 ოქტომბერს, შეხვედრა გაიმართა ევროკავშირის საქართველოსთან ურთიერთობებში პოლიტიკურ ოფიცერთან მიხაელა პოპასთან და სამხრეთ კავკასიაში ევროკავშირის სპეციალური წარმომადგენლის მრჩეველთან ვერონიკა ჩერნასთან.
ინფორმაციაში აღნიშნულია, რომ შეხვედრაზე განიხილეს საქართველოსთვის კანდიდატი ქვეყნის სტატუსის მინიჭების საკითხი, ევროკავშირის 12 რეკომენდაცია და იმ რეფორმების აუცილებლობა, რომელთა განხორციელებას ევროკავშირი ჩვენი ქვეყნისგან ითხოვს.
პაატა დავითაიას განცხადებით, ევროკომისიის მაღალჩინოსნებმა განსაკუთრებით გაამახვილეს ყურადღება იმ საფრთხეებზე, რაც ქვეყანას აქვს რუსეთის ფედერაციიდან. შეხვედრაზე „ევროპელი დემოკრატების“ ლიდერების მხრიდან დეტალურად იქნა მიწოდებული ინფორმაცია ოჩამჩირის სამხედრო-საზღვაო ბაზის და აქედან გამომდინარე გაზრდილი საფრთხეების შესახებ.
„პარტიის გენერალური მდივნის მამუკა გამყრელიძის მიერ შეხვედრაზე შეფასებული იქნა საქართველოს და ჩინეთის თანამშრომლობის ახალ ფორმატთან დაკავშირებული რისკები და ჩინეთიდან მომავალი საფრთხეები. ევროკომისიის წარმომადგენლებმა განსაკუთრებული ინტერესი გამოხატეს მამუკა გამყრელიძის, როგორც ჩინეთში საქართველოს ყოფილი ელჩის მიმართ, შესაბამისად, მიიღეს კომპეტენტური და ამომწურავი ინფორმაცია ყველა მნიშვნელოვან საკითხზე. ევროკომისიის წარმომადგენლებმა ასევე დიდი ინტერესი გამოხატეს საარჩევნო სისტემებთან, საარჩევნო ბარიერთან და მოახლოებული არჩევნების ჩატარებასთან დაკავშირებულ საკითხებზე, რაც ძალიან მნიშვნელოვანია 2024 წლის არჩევნების დემოკრატიულად ჩასატარებლად. ჩვენი შეხვედრა ევროკომისიის მაღალჩინოსნებთან არის ერთ-ერთი ბოლო შეხვედრა 8 ნოემბრამდე, როცა უნდა გასაჯაროვდეს ევროკომისიის შუალედური დასკვნა კანდიდატი ქვეყნის სტატუსის მინიჭებასთან დაკავშირებით. ჩვენ გავაჟღერეთ მთავარი გზავნილი, რომ ჩვენმა ქვეყანამ სტატუსი აუცილებლად უნდა მიიღოს. იმედს ვიტოვებ, რომ დარჩენილ დროში ყველაფერი გაკეთდება სტატუსის მისაღებად, რადგან ბრიუსელში კარგად აქვთ გაცნობიერებული, რომ ეს სასიცოცხლოდ მნიშვნელოვანია მომატებული საფრთხეების ფონზე ჩვენი ქვეყნისთვის და ეს დაიმსახურა ხალხმა, რომელსაც გაცხადებული აქვს მისწრაფება - ქვეყანა დაბრუნდეს ევროპულ ოჯახში“,- აცხადებს პაატა დავითაია.
