ისრაელის თავდაცვის ძალებმა და თავდაცვის სამინისტრომ განაცხადეს, რომ ლიბანის საზღვართან ახლომდებარე კიდევ 14 დასახლების მოსახლეობის ევაკუაციას გეგმავენ, - ინფორმაციას The Times of Israel-ი ავრცელებს.

განცხადებაში აღნიშნულია, რომ გადაწყვეტილება ბოლო ორი კვირის განმავლობაში „ჰეზბოლას“ მხრიდან ისრაელის ტერიტორიის გახშირებული სარაკეტო თავდასხმების ფონზე მიიღეს.

ისრაელის თავდაცვის სამინისტროს საგანგებო სიტუაციების მართვის ეროვნული სამსახურის ინფორმაციით, მოსახლეობას სახელმწიფოს მიერ დაფინანსებულ საოჯახო სასტუმროებში განათავსებენ.

შეგახსენებთ, საგანგებო სიტუაციების მართვის სამსახურმა გასულ კვირას ლიბანის საზღვართან 2 კილომეტრის მანძილზე მდებარე 28 დასახლების ევაკუაცია დაიწყო.