რუსულმა ძალებმა ხმელნიცკის ოლქის შეპეტოვსკის რაიონზე დრონებით თავდასხმა განახორციელეს, ჩამოგდებული დრონების ნამსხვრევები კრიტიკული ინფრასტრუქტურის ობიექტის ტერიტორიაზე დაეცა, დაშავებულია 16 ადამიანი, - ინფორმაციას უკრაინული მედია ავრცელებს.

„შეპეტოვსკის რაიონში, მტრის საჰაერო სამიზნეების ჩამოგდების შედეგად, ნამსხვრევები კრიტიკული ინფრასტრუქტურის ობიექტის ტერიტორიაზე დაეცა. აფეთქების ტალღამ დააზიანა არასაცხოვრებელი ფართები, საცხოვრებელი კორპუსები და ავტომობილები. 16-მა მოქალაქემ სხვადასხვა სახის დაზიანება მიიღო“, - განაცხადა ხმელნიცკის საოლქო-სამხედრო ადმინისტრაციის ხელმძღვანელის მოადგილემ, სერგეი ტიურინმა.

მისი თქმით, ნამსხვრევები ასევე ჩამოვარდა ხმელნიცკის რაიონში, მაგრამ ზიანი არ გამოუწვევია. მანამდე გავრცელდა ინფორმაცია, რომ 25 ოქტომბრის ღამეს რუსმა სამხედროებმა უკრაინას Shahed-ის ტიპის 11 კამიკაძე-დრონით შეუტიეს, თუმცა უკრაინის თავდაცვის ძალებმა ყველა დრონის ჩამოგდება შეძლეს.