საპროცედურო საკითხთა და წესების კომიტეტის სხდომაზე, პარლამენტის რეგლამენტში ცვლილებების პროექტი მეორე მოსმენით, მუხლობრივად განიხილეს.

ამის შესახებ ინფორმაციას საქართველოს პარლამენტი ავრცელებს.

მათივე ცნობით, რეგლამენტში ცვლილებები, კანონპროექტის ერთ-ერთმა ინიციატორმა, საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა წარადგინა.

„ამ მოწვევის პარლამენტში უკვე სამჯერ შევიტანეთ რეგლამენტში ცვლილებები და პირველი ცვლილება სწორედ 12 რეკომენდაციის შესრულებას უკავშირდებოდა, საპარლამენტო კონტროლის მექანიზმების გაზრდის კუთხით. ჩვენ მუდმივად ვაგრძელებთ რეგლამენტის მონიტორინგს და პარლამენტის მუშაობის საჭიროებებიდან გამომდინარე, მასში გარკვეული ცვლილებები შეგვაქვს. ვიმედოვნებთ, რომ წარმოდგენილი ცვლილებები არანაირად არ შეზღუდავს პარლამენტის მუშაობის გამჭვირვალობას და პირიქით, პარლამენტის მუშაობას შეუწყობს ხელს", - განაცხადა ირაკლი ქადაგიშვილმა.

მათივე ცნობით, პროექტის თანახმად, საპარლამენტო საქმიანობასთან დაკავშირებული ცალკეული საკითხები ზუსტდება, მათ შორის, პარლამენტის სასახლეში უსაფრთხოების დაცვის რეჟიმთან დაკავშირებული რეგულაციები, იზრდება პარლამენტის თავმჯდომარის მოადგილეების რაოდენობა და ნაცვლად 2-2 მოადგილისა, პარლამენტის თავმჯდომარის მოადგილედ შესაძლებელია აირჩეს 3 მოადგილე საპარლამენტო უმრავლესობიდან და 3 მოადგილე საპარლამენტო ოპოზიციაში შემავალი ფრაქციებიდან.

ამასთან, აღნიშნულია, რომ რეგლამენტის პროექტით იცვლება პარლამენტის მიერ თანამდებობის პირების თანამდებობაზე არჩევის თაობაზე გადაწყვეტილების ფარული კენჭისყრით მიღების წესიც და აღნიშნულ გადაწყვეტილებას პარლამენტი მიიღებს ღია კენჭისყრის საფუძველზე. კენჭისყრისას ფარულობის წესი მხოლოდ პარლამენტის თავმჯდომარის არჩევის შემთხვევაში შენარჩუნდება, ვინაიდან ამას განსაზღვრავს საქართველოს კონსტიტუცია. კომიტეტმა კანონპროექტს, განხილვაზე გამოთქმული შენიშვნების გათვალისწინებით, მეორე მოსმენით მხარი დაუჭირა. კომიტეტმა ასევე მხარი დაუჭირა თანმდევ კანონპროექტებს.