იორდანია, რეგიონული ესკალაციის შიშის ფონზე, აშშ-ს „პატრიოტის“ საჰაერო თავდაცვის სისტემას სთხოვს
აშშ-ის ახლო მოკავშირე იორდანიამ ვაშინგტონს სთხოვა, რომ ქვეყნის საჰაერო თავდაცვის გასაძლიერებლად, მის საზღვრებზე „პატრიოტის“ რაკეტები განათავსოს.
"ჩვენ ვთხოვეთ ამერიკულ მხარეს, გაეძლიერებინა ჩვენი თავდაცვის სისტემა „პატრიოტის“ რაკეტებით. ეს სისტემა ძვირია, ადგილობრივი შესაძლებლობებით მისი გამოყენება შეუძლებელია და ჩვენ გვჭირდება სტრატეგიული პარტნიორი", - განაცხადა იორდანიის არმიის პრესსპიკერმა, გენერალმა მუსტაფა ალ-ჰიარიმ.
მისი თქმით, იორდანია მუდმივი საფრთხეების წინაშე დგას, მათ შორის ბალისტიკური რაკეტებით ჩრდილოეთიდან, აღმოსავლეთიდან და დასავლეთიდან და „პატრიოტის“ საჰაერო თავდაცვის სისტემა საუკეთესო იარაღია ამ საფრთხესთან გასამკლავებლად.
იორდანია აშშ-ს დახმარებას იმ ფონზე სთხოვს, როდესაც ღაზაში ომისა და ლიბან-ისრაელის საზღვარზე „ჰეზბოლასა“ და ისრაელის ძალებს შორის შეტაკებების გამო ახლო აღმოსავლეთში დაძაბულობა იზრდება.
