ეკონომიკისა და მდგრადი განვითარების სამინისტროს „მთის ტრასების სააგენტოს“ (MTA) ორგანიზებით, გუდაურსა და ბაკურიანს, 2023-2024 წლის მსოფლიო თასების გასამართ ღონისძიებებთან დაკავშირებით, საერთაშორისო სათხილამურო ფედერაციისა (FIS) და Infront Sports & Media-ს წარმომადგენლები ესტუმრნენ. ინფორმაციას მთის ტრასების სააგენტო ავრცელებს.

მათივე ცნობით, FIS-ის დელეგატებმა კურორტებზე ინფრასტრუქტურისა და საშეჯიბრო ტრასების მიმართულებით გეგმური ინსპექტირება განახორციელეს, ხოლო Infront Sports & Media-ს წარმომადგენლებმა ლოკაციები განსაზღვრეს, საიდანაც სხვადასხვა მედია პლატფორმაზე პირდაპირი ტრანსლირება უნდა მოხდეს.

„ჩამოვედით გუდაურში, რათა მსოფლიო თასის ჩემპიონატისთვის ინსპექტირება ჩავატაროთ. ჩვენ ვიხილეთ არაჩვეულებრივი მთა, კარგი ბუნებრივი მახასიათებლებით. ძალიან მოტივირებული გუნდი დაგვხვდა, იმისთვის რომ მსოფლიო თასები კარგად ჩავატაროთ. მოუთმენლად ველოდები, როდის დავბრუნდები გუდაურში, რათა ვიმუშაო ამ არაჩვეულებრივ გუნდთან ერთად“,- განაცხადა საერთაშორისო სათხილამურო ფედერაციის (FIS) დელეგატმა, ნიკოლა ვოდრუმ.

„ეს ინფრონტის პირველი ვიზიტია გუდაურში, რათა ადგილები შევარჩიოთ. გარემო არაჩვეულებრივია, მოხარული ვარ აქ ყოფნით. ჩვენ ვმუშაობთ საერთაშორისო სათხილამურო ფედერაციასთან, „ემ თი ეისთან“ და "ჯი ეს ეფთან" ერთად. მოვიძიებთ არეალებს, თუ სად შეიძლება, დავაყენოთ კამერები, იმისთვის რომ მზად ვიყოთ თებერვლისთვის“, - განაცხადა დიეგო ფავიერცანიმა, Infront Sports & Media-ს აღმასრულებელი პროდიუსერმა.

გავრცელებული ინფორმაციის თანახმად, საქართველომ ბაკურიანი 2023-ის მსოფლიო ჩემპიონატს წარმატებით უმასპინძლა, სწორედ ამიტომ, საერთაშორისო სათხილამურო ფედერაციის (FIS) გადაწყვეტილებით, გუდაური და ბაკურიანი, საერთაშორისო დონის, მსოფლიო თასის ეტაპებს ყოველწლიურად უმასპინძლებს. 2023-2024 წლის ზამთრის სეზონზე მსოფლიო თასის ეტაპები ბაკურიანში მოგულსისა და სქი ქროსის, ხოლო გუდაურში სნოუბორდ ქროსის დისციპლინებში ჩატარდება.

“2023- 2024 წლის ზამთრის სეზონი ძალიან მნიშვნელოვანია ჩვენთვის. საერთაშორისო ღონისძიების მიმართულებით დატვირთულია კალენდარი, როგორც გუდაურში, ასევე ბაკურიანში. ინსპექტირების მიზნით, საერთაშორისო დელეგატები იმყოფებიან, რათა ჩვენს მიერ განხორციელებული სამუშაოები შეაფასონ. მათი შეფასებები ძალიან პოზიტიურია, შესაბამისად დარწმუნებით შემიძლია ვთქვა, რომ ჩვენი გუნდი მსოფლიო თასის ეტაპებსაც ღირსეულად უმასპინძლებს“,- განაცხადა მთის ტრასების სააგენტოს (MTA) დირექტორმა ირაკლი ბურჭულაძემ.