რუსეთის პრეზიდენტი, ვლადიმერ პუტინი დაღესტანში, მაჰაჩყალას აეროპორტში განვითარებულ მოვლენებთან დაკავშირებით დღეს სამართალდამცავი უწყებების ხელმძღვანელებსა და რუსეთის ხელისუფლების სხვა მაღალჩინოსნებს შეხვდება.

კრემლის პრესსპიკერის, დიმიტრი პესკოვის განცხადებით, შეხვედრაზე განიხილავენ „დასავლეთის მცდელობებს, ახლო აღმოსავლეთში მიმდინარე მოვლენები საზოგადოების გახლეჩად გამოიყენოს“.

„პრეზიდენტი ყოველთვის დიდ ყურადღებას აქცევდა და აქცევს ამ თემას. გასულ კვირას მან შეხვედრა გამართა რელიგიური კონფესიების ლიდერებთან, სადაც ეს თემა განიხილეს“, - განუცხადა ჟურნალისტებს კრემლის წარმომადგენელმა.

შეხვედრას რუსეთის პრემიერ-მინისტრი მიხაილ მიშუსტინი, ფედერაციის საბჭოს სპიკერი ვალენტინა მატვიენკო და ფედერალური ასამბლეის ქვედა პალატის თავმჯდომარე ვიაჩესლავ ვოლოდინი, გენერალური პროკურორი იგორ კრასნოვი, საგამოძიებო კომიტეტის ხელმძღვანელი ალექსანდრე ბასტრიკინი, უსაფრთხოების საბჭოს თავმჯდომარის მოადგილე დიმიტრი მედვედევი, საგარეო საქმეთა და თავდაცვის სამინისტროს ხელმძღვანელები, სერგეი ლავროვი და სერგეი შოიგუ, რუსეთის ფედერალური უსაფრთხოების სამსახურის დირექტორი ალექსანდრე ბორტნიკოვი, რუსეთის გვარდიის ხელმძღვანელი ვიქტორ ზოლოტოვი, რუსეთის ფედერაციის საგარეო დაზვერვის სამსახურის დირექტორი სერგეი ნარიშკინი და შინაგან საქმეთა სამინისტროს უფროსის პირველი მოადგილე ალექსანდრე გოროვოი დაესწრებიან.

შეგახსენებთ, კვირას დაღესტანში, მაჰაჩყალას აეროპორტში მომიტინგეები მას შემდეგ შეიჭრნენ, რაც იქ ისრაელიდან თვითმფრინავი ჩაფრინდა. უსაფრთხოების ძალებმა აეროპორტი დროებით დახურეს და აქციის მონაწილეები ტერიტორიიდან გაიყვანეს. მომხდართან დაკავშირებით, სამართალდამცავებმა 60 პირი დააკავეს. რუსეთის პრეზიდენტის პრესსპიკერმა, დიმიტრი პესკოვმა განაცხადა, რომ მაჰაჩყალას აეროპორტში განვითარებული მოვლენები გარე ჩარევის შედეგია.