„ნაციონალური მოძრაობა“ - ფარსად ქცეული სასამართლო პროცესები უნდა შეწყდეს - სააკაშვილი უნდა გათავისუფლდეს და მიეცეს საზღვარგარეთ სრულფასოვანი მკურნალობის საშუალება
ფარსად ქცეული სასამართლო პროცესები უნდა შეწყდეს! პრეზიდენტი სააკაშვილი უნდა გათავისუფლდეს და მიეცეს საზღვარგარეთ სრულფასოვანი მკურნალობის საშუალება!, - ამის შესახებ ნათქვამია “ერთიანი ნაციონალური მოძრაობის” განცხადებაში.
როგორც პარტიის მიერ გავრცელებულ განცხადებაშია აღნიშნული, დღევანდელ სასამართლო პროცესზე მოსამართლემ პრეზიდენტ სააკაშვილს სიტყვით გამოსვლა გაუფრთხილებლად შეაწყვეტინა და სხდომიდან გათიშა, რაც არა მხოლოდ უხეში პროცედურული დარღვევაა, არამედ კიდევ ერთი დასტურია, რომ სააკაშვილი ვერ სარგებლობს სამართლიანი სასამართლოს უფლებით.
“პრეზიდენტ სააკაშვილის პოლიტიკური პატიმრობა საქართველოში პოლარიზაციის ყველაზე მკაფიო გამოხატულებაა. მის წინააღმდეგ საქმეების აღძვრა ბიძინა ივანიშვილმა პრემიერ-მინისტრის თანამდებობაზე ყოფნის დროს დააანონსა, იმ დროს, როდესაც საქართველოს გენერალური პროკურორი შეერთებული შტატების მიერ სანქცირებული, რუსეთის უსაფრთხოების ფედერალური სამსახურის გავლენის აგენტი ოთარ ფარცხალაძე იყო.
პოლარიზაციის დასრულება - ევროკავშირის კანდიდატი ქვეყნის სტატუსის მიღების პირველი წინაპირობაა. ევროკავშირის კანდიდატი ქვეყნის სტატუსის მიღების წინაპირობაა ასევე სასამართლოს დამოუკიდებლობა. აპრილში, შეერთებულმა შტატებმა სავიზო შეზღუდვა გაავრცელა საქართველოს სასამართლო სისტემაში არსებული კლანის 4 წევრზე. პრეზიდენტ სააკაშვილის პოლიტიკური პატიმრობა ასევე ავლენს ივანიშვილის ხელისუფლების მიერ სასამართლო ხელისუფლების სრულად ხელში ჩაგდების ფაქტს.
ფაქტია, რომ პრეზიდენტი სააკაშვილი ვერ სარგებლობს სამართლიანი სასამართლოს უფლებით. მისი ჯანმრთელობის უმძიმესი მდგომარეობის გათვალისწინებით, იგი, სურვილის მოუხედავად, ვერ ესწრება სასამართლო სხდომებს. სასამართლო სხდომებზე პრეზიდენტ სააკაშვილის ჩართვას კი სასამართლო, როგორც წესი, სერიოზული ტექნიკური ხარვეზებით ახორციელებდა.
2023 წლის 30 ოქტომბერს ივანიშვილის რეჟიმმა უსამართლობისა და უკანონობის ახალი სიმაღლე დაიპყრო. მოსამართლემ პრეზიდენტ სააკაშვილს სიტყვით გამოსვლა გაუფრთხილებლად შეაწყვეტინა და სხდომიდან გათიშა. ეს ფაქტი არა უბრალოდ უხეში პროცედურული დარღვევაა, არამედ კიდევ ერთი დასტურია, რომ პრეზიდენტი სააკაშვილი ვერ სარგებლობს სამართლიანი სასამართლოს უფლებით და ის, რომ მის მიმართ წარმოებს პოლიტიკური დევნა.
ფარსად ქცეული სასამართლო პროცესები უნდა შეწყდეს, პრეზიდენტი სააკაშვილი უნდა გათავისუფლდეს და მიეცეს საზღვარგარეთ სრულფასოვანი მკურნალობის საშუალება“, - აღნიშნულია პარტიის განცხადებაში.
