უცნაურად გაღიზიანდა ოპოზიციის რამდენიმე წარმომადგენელი, „მადლობებს“ რატომ იხდიან დეპუტატებიო და ეს მგონი, მცდარი შეხედულების ტირაჟირების მცდელობაა, - ამის შესახებ ადამიანის უფლებათა კომიტეტის თავმჯდომარე, მიხეილ სარჯველაძემ პარლამენტში განაცხადა, სადაც რეგიონული განვითარებისა და ინფრასტრუქტურის მინისტრი, ირაკლი ქარსელაძე სამინისტროს 2022 წლის საქმიანობის შესახებ ანგარიშს წარადგენს.

მიხეილ სარჯველაძის შეფასებით, ასეთი რიტორიკა უფრო მეტად პოპულიზმზეა გათვლილი და წინა ხელისუფლებას „ქართული ოცნების“ მიმართ ინფრასტრუქტურული პროექტების დროულად და ეფექტიანად განხორციელების კუთხით სასაყვედურო არაფერი აქვს.

„აბსოლუტურად მართებულად მინისტრი, სამინისტრო უკლებლივ ყველა თანამშრომლის ჩათვლით, მადლობას იმსახურებს. რამდენიც არ უნდა იძახოს ახლა ბატონმა ბექა ლილუაშვილმა, რომ სადღაც პარკი გაკეთდა და იქ ხე გახმა, როდესაც ვიცით, იმ გამხმარ ხეს რა ეშველება და ხვალ რომ გაკეთდება, რასაკვირველია, სამინისტრო მადლობას იმსახურებს. მგონი არასდროს ზედმეტი არ არის ამ მადლიერების გამოცხადება. არც ვიცი, რა მიზანს ისახავს ასეთი რიტორიკა, რომელიც მეჩვენება, რომ უფრო მეტად პოპულიზმზეა გათვლილი ან დილეტანტურია. ამ ყველაფრიდან გამომდინარე, ეს არის წმინდა წყლის დემაგოგიაც. მაგალითად, როცა ჩამოვთვლით, რომ რომელიმე მუნიციპალიტეტის რომელიმე სოფელში წყალი არ არის, წარმოუდგენელია, ვინმეს ეს უხაროდეს. ეს პრობლემა არსებობს და უბრალოდ შევადაროთ. ამ ხელისუფლების პირობებში როგორია მაგალითად ტემპი და ბიუჯეტის ხარჯვა იმ მიმართულებით, რაც არის მოსახლეობის უწყვეტი წყალმომარაგებით უზრუნველყოფა. წინა ხელისუფლებას ნამდვილად არაფერი აქვს სათქმელი და ხელისუფლებასთან ამ კუთხით სასაყვედურო“,-განაცხადა სარჯველაძემ.