მიხეილ სააკაშვილის წარმომადგენელი სოფო ჯაფარიძე, ექიმების ჯგუფთან ერთად, კურდღელაურში ადგილობრივებს უფასო სამედიცინო კონსულტაციას უწევს
საქართველოს მესამე პრეზიდენტის, მიხეილ სააკაშვილის ჰუმანიტარული ინიციატივით, მისი წარმომადგენელი სოფო ჯაფარიძე, თელავში სოფელ კურდღელაურში ექიმების ჯგუფთან ერთად იმყოფება, სადაც ისინი გეგმავენ, რომ კურდღელაურის მოსახლეობას უფასო სამედიცინო კონსულტაცია გაუწიონ.
პარტია „ნაციონალური მოძრაობის“ პრესსამსახურის ცნობით, აღნიშნული ჰუმანიტარული კამპანია დღეს სოფელ კურდღელაურიდან დაიწყო და მთელი საქართველოს მასშტაბით გაგრძელდება.
„ჩამოვედით კურდღელაურში, ჩამოვიყვანე საქართველოში მართლაც წამყვანი ექიმები, ისინი მზად არიან, რომ დაუდგნენ გვერდით ჩვენს მოქალაქეებს. როდესაც მათ ვუთხარი, რომ ვგეგმავდით ჰუმანიტარული პროექტი გაგვეკეთებინა, დიდი სიხარულით დამთანხმდნენ. ჩამოვედით და მაქსიმალურად შევეცდებით, რომ კურდღელაურის მოსახლეობას დავუდგეთ გვერდით და მათი საჭიროებისამებრ გავაკეთოთ ყველაფერი, რაც მათ სჭირდებათ“, - განაცხადა სოფო ჯაფარიძემ.
