იმედი მაქვს, რომ მიღებული იქნება გადაწყვეტილება და საქართველო მიიღებს ევროკავშირის კანდიდატის სტატუსს, მიუხედავად "ქართული ოცნების" საბოტაჟისა და მათ მიერ გადადგმული ყველა დესტრუქციული ნაბიჯისა, - ამის შესახებ "ლელოს" ლიდერმა ბადრი ჯაფარიძემ ჟურნალისტებთან განაცხადა.

ის გამოეხმაურა პრეზიდენტ სალომე ზურაბიშვილის 8 ნოემბერს ორბელიანების სასახლესთან შეკრების მოწოდებას და აღნიშნა, რომ "ლელო" ღონისძიებას დაესწრება.

"ჩვენი სურვილი იყო ჯერ კიდევ ერთი წლის წინ მიეღო ქვეყანას კანდიდატის სტატუსი და ახლაც ჩვენი სურვილია, რომ ამ წლის ბოლოს მიღებული იქნას გეოპოლიტიკური გადაწყვეტილება და ქართველი ხალხის სწრაფვა იქნას დაჯილდოებული. ქართველმა ხალხმა არაერთხელ, ბევრი ქართველის სიცოცხლის ფასად დაამტკიცა, რომ საქართველოს ადგილი არის ევროკავშირში და ევროპულ ოჯახში. ამიტომ, იმედია, რომ ჩვენი მეგობრები ამას დაინახავენ და ამას ხედავენ. წლის ბოლოსთვის მე იმედი მაქვს, რომ მიღებული იქნება გადაწყვეტილება და საქართველო მიიღებს ევროკავშირის კანდიდატის სტატუსს, მიუხედავად "ქართული ოცნების" საბოტაჟისა და მათ მიერ გადადგმული ყველა დესტრუქციული ნაბიჯისა.

"ლელო" შეუერთდება ყველა ღონისძიებას, რომელიც ემსახურება ჩვენი ქვეყნის ევროატლანტიკური მისწრაფებების მხარდაჭერას. შესაბამისად, ხვალაც ვიქნებით ამ ღონისძიებაზე [ორბელიანის სასახლესთან]", - განაცხადა ჯაფარიძემ.