„რუსული ოცნება“ ევროკომისიის პირობების შემსრულებელი არ არის - ერთადერთი პირობა, რომლის შესრულებაც ბიძინა ივანიშვილის აუცილებლად მოუწევს, 2024 წლის არჩევნების დემოკრატიული ჩატარებაა, რისი გარანტიც ევროკავშირი იქნება, - აღნიშნული განცხადება პარლამენტში ფრაქცია „ნაციონალური მოძრაობის“ თავმჯდომარემ თინა ბოკუჩავამ გააკეთა.

ბოკუჩავას შეფასებით, კანდიდატის სტატუსზე ევროკომისიის დადებითი რეკომენდაცია ქართველი ხალხის დამსახურება და მონაპოვარია და “ერთადერთი სუბიექტი, ვინც ამას ხაზს არ უსვამს, არის “რუსული ოცნება“.

“გუშინ ქართველმა ხალხმა და თავისუფალმა სამყარომ რუსეთს მოუგო.

ცხრა პირობა, რომელიც ევროკავშირის მხრიდან საქართველოს წინაშე დგას, უპირველეს ყოვლისა რუსულ დეზინფორმაციას ეხება, რომლის მთავარი პროპაგანდისტი თავად “რუსული ოცნებაა“, ბიძინა ივანიშვილის რეჟიმის სახით.

ევროკომისიის რეკომენდაციაა საგარეო და უსაფრთხოების პოლიტიკის ევროკავშირთან დაახლოება, რასაც რუსეთთან ფრენების აღმდგენი, კოლაბორაციონისტული პოლიტიკის გამტარებელი “რუსული ოცნება“ არ გააკეთებს.

რეკომენდაცია დეპოლარიზაციას ეხება - როდესაც რეჟიმი ძალადობასა და სიძულვილზე დგას, ის დეპოლარიზაციას არ მოახდენს. მოთხოვნაა, სახელმწიფოს ინსტიტუციური გაძლიერება - მიტაცებული სახელმწიფოს პირობებში, სადაც ყველა უწყებას ოლიგარქი აკონტროლებს, ეს არ მოხდება. ხოლო დეოლიგარქიზაციაზე ევროპელებმა განმარტეს, რომ ეს საქართველოს დებიძინიზაციას ნიშნავს. ბიძინას პირობებში დებიძინიზაცია ვერ და არ მოხდება.

ეს ყველაფერი ახალი კოალიციური, დასავლური ხელისუფლების პირობებში აუცილებლად მოხდება!“, - განაცხადა თინა ბოკუჩავამ.