საოკუპაციო ძალების მიერ მოკლულ თამაზ გინტურის ოჯახს „ქართული ოცნების“ ლიდერებმა მიუსამძიმრეს.

კირბალში იმყოფებოდნენ პარლამენტის თავმჯდომარე, შალვა პაპუაშვილი და „ქართული ოცნების“ დეპუტატები.

გინტურის სახლის მიმდებარე ტერიტორიაზე მიღებულია უსაფრთხოების ზომები, მობილიზებულია პოლიცია.

როგორც საპარლამენტო უმრავლესობის წევრმა, ირაკლი ზარქუამ სოფელ კირბალში ჟურნალისტებს განუცხადა, დამნაშავეები იდენტიფიცირებულები არიან და გამოძიება გრძელდება.

„ყველა ვაცნობიერებთ, რომ ტერიტორია ოკუპირებულია. ჩვენი იურისდიქცია იქ არ ვრცელდება. დამნაშავეები იდენტიფიცირებულები არიან, გამოძიება გრძელდება და როცა ჩვენს სახელმწიფოს შეეძლება რეაგირება, დამნაშავეები დაისჯებიან. მართლმსაჯულებას ვერ დაემალებიან.

ახლა ჩვენ, რაც შეგვიძლია არის ის, რომ უსაფრთხოება კიდევ უფრო გავამკაცროთ“,- განაცხადა ზარქუამ.

თამაზ გინტურს შაბათს, 13:00 საათზე, სოფელ კირბალში დაკრძალავენ.

ცნობისთვის, თამაზ გინტური რუსეთის საოკუპაციო ძალებმა ცეცხლსასროლი იარაღიდან გასროლით 6 ნოემბერს მოკლეს. არსებული ინფორმაციით, თამაზ გინტური და ლევან დოთიაშვილი ლომისის ეკლესიაში, სანთლების დასანთებად მიდიოდნენ, როცა რუსეთის საოკუპაციო ძალების წარმომადგენლებმა ცეცხლი გახსნეს. აღნიშნულის შედეგად თამაზ გინტური მოკლეს, ლევან დოთიაშვილი კი გაიტაცეს.