რუსეთის საწვავის მწარმოებლებს მთავრობამ დაავალა, რომ დიზელისა და ბენზინის ექსპორტის ყველა დარჩენილი შეზღუდვის გაუქმებისთვის მოემზადონ, - ამის შესახებ ინფორმაციას Reuters-ი ავრცელებს.
„მათ უთხრეს მწარმოებლებს, რომ ექსპორტი მომავალი კვირიდან განახლდება”, - განუცხადა სააგენტოს ერთ-ერთმა წყარომ, რომელმაც, ასეთი გადაწყვეტილებების სენსიტიურობის გამო, ანონიმურობის დაცვის პირობით ისაუბრა.
კიდევ ერთმა წყარომ Reuters-ს განუცხადა, რომ აკრძალვა მომავალ კვირას მოიხსნება.
„ისინი დაგვპირდნენ, რომ მომავალ კვირას გააუქმებენ ექსპორტის აკრძალვას. ამ დაპირებასთან დაკავშირებით, ჩამოვაყალიბეთ ექსპორტის გრაფიკი და დახვეწის გეგმა", - აღნიშნა წყარომ სააგენტოსთან საუბარში.
რუსეთმა, მაღალი შიდა ფასებისა და დეფიციტის პრობლემების მოგვარების მიზეზით, საწვავის ექსპორტის აკრძალვა 21 სექტემბერს დააწესა. მთავრობამ შეზღუდვები 6 ოქტომბერს შეამსუბუქა და დიზელის მილსადენით ექსპორტი დაუშვა, მაგრამ დატოვა შეზღუდვები ბენზინის ექსპორტზე. ასევე აკრძალულია ბენზინის საზღვარგარეთ გატანა სატვირთო მანქანებისა და რკინიგზის საშუალებით.