საქართველოს მთავრობამ ძალიან ცოტა რამ გააკეთა იმისთვის, რომ კანდიდატის სტატუსი დაემსახურებინა. ის ევროკავშირისა და მისი ღირებულებებისგან დისტანცირდა, - ასე ეხმაურება გერმანიის ბუნდესტაგის საგარეო ურთიერთობათა კომიტეტის თავმჯდომარე, მიხაელ როთი ევროკომისიის მიერ ევროკავშირის ლიდერებისთვის მიცემულ რეკომენდაციას საქართველოსთვის კანდიდატის სტატუსის მინიჭებასთან დაკავშირებით.

მიხაელ როთი მიიჩნევს, რომ ევროკომისიის რეკომენდაცია არის საჩუქარი სამოქალაქო საზოგადოებისა და საქართველოს მოსახლეობისთვის.

„საქართველოს მთავრობამ ძალიან ცოტა რამ გააკეთა იმისთვის, რომ კანდიდატის სტატუსი დაემსახურებინა. ის ევროკავშირისა და მისი ღირებულებებისგან დისტანცირდა. ამიტომ, რეკომენდაცია საქართველოსთვის კანდიდატის სტატუსის მინიჭების შესახებ, უპირველეს ყოვლისა, უნდა იქნას გაგებული, როგორც საჩუქარი აბსოლუტურად ევროკავშირის მომხრე სამოქალაქო საზოგადოებისა და საქართველოს მოსახლეობისთვის“, - წერს ბუნდესტაგის საგარეო ურთიერთობათა კომიტეტის თავმჯდომარე სოციალურ ქსელში.