ისლანდიამ მიწისძვრების სერიის შედეგად გამოწვეული ვულკანის ამოფრქვევის საფრთხის გამო საგანგებო მდგომარეობა გამოაცხადა. ინფორმაციას BBC-ი ავრცელებს.

გამოცემის ცნობით, სიფრთხილის მიზნით, ქალაქ გრინდავიკში მცხოვრები ათასობით მოქალაქის ევაკუაციის განკარგულება გაიცა.

ისლანდიის მეტეოროლოგიურ ოფისში აცხადებენ, რომ რეიკიანესის ნახევარკუნძულზე ან მის მახლობლად ვულკანის ამოფრქვევის მნიშვნელოვანი რისკი არსებობს. უწყების განცხადებაში ნათქვამია, რომ ამოფრქვევა შეიძლება უახლოეს დღეებში ნებისმიერ დროს დაიწყოს.

ბოლო კვირებში ვულკან ფაგრადალსფიადლის გარშემო ათასობით ბიძგი დაფიქსირდა. აღნიშნული ვულკანი 2021 წლის ამოფრქვევამდე, 800 წლის განმავლობაში მიძინებული იყო.