ჩვენთვის „ევროპის სახალხო პარტიის“ (EPP) ასეთ რეზოლუციებს არავითარი ფასი არ აქვს, - ამის შესახებ „ქართული ოცნების“ თავმჯდომარე, ირაკლი კობახიძემ ჟურნალისტებს განუცხადა.

მან „ევროპის სახალხო პარტიის“ (EPP) პოლიტიკური ასამბლეის მიერ მიღებული რეზოლუცია შეაფასა, რომელიც მოუწოდებს საქართველოს ხელისუფლებას, მიიღოს სასწრაფო ზომები მიხეილ სააკაშვილის ჯანმრთელობის დასაცავად და დაუყოვნებლივ გაათავისუფლოს ის.

„მგონი, ჯანმრთელობის მდგომარეობასთან დაკავშირებითაც არ მიუღიათ განახლებული ინფორმაცია. არ შემიძლია ამასთან დაკავშირებით სერიოზული კომენტარი გავაკეთო, როცა კიდევ ერთხელ ყველამ გაიგო, რომ ეს კაცი ჯანმრთელია და “ევროპის სახალხო პარტიამ“ ახლაც კი ვერ გაიგო, რომ ეს კაცი არის ჯანმრთელი“, - განაცხადა კობახიძემ.

რაც შეხება მიხეილ სააკაშვილის პოლიტპატიმრად მოხსენიებას, ირაკლი კობახიძე მიიჩნევს, რომ ეს არასერიოზული ჩანაწერია.

„EPP და „ნაცმოძრაობა“ არის ერთი პოლიტიკური ჯგუფი, „ნაცმოძრაობა“ არის EPP-ის წევრი ოფიციალურად. შესაბამისად, ეს რაღაცნაირად შეიძლება აიხსნას, მაგრამ ასეთ რეზოლუციას გამართლება არავითარ შემთხვევაში არ აქვს“, - განაცხადა კობახიძემ.