ვენეციის კომისიას აინტერესებს, როგორ მოხდება 12-პუნქტიანი გეგმის შეუსრულებელი პუნქტების შესრულება და რა მოთხოვნები უნდა ჩამოყალიბდეს, რომ ქვეყანას მიეცეს საშინაო დავალება, რათა სტატუსი წარმატებულად მიიღოს, - ამის შესახებ ჟურნალისტებთან ვენეციის კომისიის დელეგაციასთან შეხვედრის შემდეგ „ნაციონალური მოძრაობის“ დეპუტატმა ლევან ბეჟაშვილმა განაცხადა.

მისი თქმით, საკითხები, რაც აინტერესებდა ვენეციის კომისიას, იყო საარჩევნო კოდექსი, სასამართლო რეფორმა და იუსტიციის უმაღლესი საბჭო, ასევე მათ ჰქონდათ კითხვები კონკრეტული სამსახურების დამოუკიდებლობის გარანტიებთან დაკავშირებით.

„შედგა ოპოზიციის შეხვედრა ვენეციის კომისიის სამდივნოსთან. ვენეციის კომისიას აინტერესებს ოპოზიციის მოსაზრებები იმ საკითხებზე, რომელიც აქტუალურია რეკომენდაციების შესრულების თვალსაზრისით. საკითხები ეხებოდა საარჩევნო რეფორმას, სახელმწიფო ინსპექტორის და ანტიკორუფციული სამსახურის საქმიანობას და დამოუკიდებლობის გარანტიებს, ამ მიმართულებით მათ გააჩნიათ კრიტიკული კითხვები და ოპოზიციის აზრი მათთვის მნიშვნელოვანი იყო. სასამართლო რეფორმაზე, იუსტიციის უმაღლეს საბჭოსთან დაკავშირებით იყო კითხვები. ერთი სიტყვით, ვენეციის კომისიას აინტერესებს, როგორ მოხდება 12-პუნქტიანი გეგმის შეუსრულებელი პუნქტების შესრულება და რა მოთხოვნები უნდა ჩამოყალიბდეს, რომ ქვეყანას მიეცეს საშინაო დავალება, რათა ქვეყანამ სტატუსი მიიღოს წარმატებულად“, - განაცხადა ბეჟაშვილმა.