დავით ფაცაციამ აფხაზეთიდან გადმოსვენებულთა ხსოვნას პატივი მიაგო
90-იან წლებში განვითარებული ტრაგიკული მოვლენების დროს დაღუპულ და აფხაზეთიდან გადმოსვენებულთა ხსოვნას, საქართველოს მთავრობისა და აფხაზეთის ავტონომიური რესპუბლიკის მთავრობის წევრებთან ერთად, პატივი მიაგო აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ. ამის შესახებ ინფორმაციას აფხაზეთის ავტონომიური რესპუბლიკის მთავრობის პრესსამსახური ავრცელებს.
„პატივი მივაგეთ, 90-იან წლებში განვითარებული ტრაგიკული მოვლენების დროს დაღუპულ და აფხაზეთიდან გადმოსვენებულ ჩვენს თანამოქალაქეებს.
უდიდესი ტკივილია ოჯახის წევრის, ახლობლის გაუჩინარება, როცა სანუგეშოდ საფლავიც არ გაქვს. საქართველოს ხელისუფლება ყველაფერს აკეთებს იმისთვის, რომ დაადგინოს მათი დაკარგული ახლობლების ხვედრი, ადგილსამყოფელი და დაასრულოს ხანგრძლივი და მტანჯველი მოლოდინი.
განსაკუთრებულ მადლობას ვუხდი წითელი ჯვრის საერთაშორისო კომიტეტს და შერიგებისა და სამოქალაქო თანასწორობის საკითხებში სახელმწიფო მინისტრის აპარატს, ჩვენი მოსახლეობისა და სამშობლოსთვის უაღრესად მნიშვნელოვანი საქმიანობისთვის, რომელთა დახმარებით არაერთი უგზო-უკვლოდ დაკარგული ჩვენი მოქალაქის ნეშტის გადმოსვენება და იდენტიფიცირება მოხერხდა, იმ საკოორდინაციო მექანიზმის ფარგლებში, რომელშიც ჩართული არის როგორც ქართული, ისე აფხაზური მხარეც.
არასდროს განმეორდება ის ტრაგედია, რომელსაც უამრავი ჩვენი გმირი თანამოქალაქის სიცოცხლე შეეწირა. ჩვენ, ქართველები და აფხაზები განწირულები ვართ ერთად ცხოვრებისთვის და მწამს, რომ მშვიდობით და ერთმანეთის ნდობით შევქმნით სიყვარულზე დაფუძნებულ ახალ, ძლიერ ერთობას.
ვუსამძიმრებ გადმოსვენებულთა ოჯახებს და პატივს მივაგებ საქართველოს ერთიანობისთვის დაღუპული ჩვენი გმირი თანამოქალაქეების ხსოვნას!“, - აცხადებს დავით ფაცაცია.
შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი ძალისხმევით, აფხაზეთის ოკუპირებული რეგიონიდან გადმოსვენებული, 1990-იანი წლების შეიარაღებული მოქმედებების დროს უგზო-უკვლოდ დაკარგული 20 პირის სამოქალაქო პანაშვიდი, სამების საკათედრო ტაძარში, ორი დღის განმავლობაში მიმდინარეობდა.
ხუთი მებრძოლი დიღმის ძმათა სასაფლაოზე, დანარჩენები კი, ოჯახების გადაწყვეტილებით, სხვადასხვა ლოკაციაზე, მათ შორის საგვარეულო სასაფლაოებზე სამხედრო პატივით დაკრძალეს.
