ოკუპირებული აფხაზეთის ე.წ. პრეზიდენტმა ასლან ბჟანიამ არასამთავრობო ორგანიზაციების რეგულირების შესახებ განკარგულებას მოაწერა ხელი.

ამის შესახებ ინფორმაციას Ekhokavkaza ავრცელებს.

Ekhokavkaza-ს ცნობით, ოკუპირებული აფხაზეთის ე.წ. პრეზიდენტმა ასლან ბჟანიამ „უცხოური არასამთავრობო და საერთაშორისო ორგანიზაციების პროექტების განხორციელების გარკვეული ღონისძიებების შესახებ“ განკარგულებაში ცვლილებები შეიტანა.

დოკუმენტის მიხედვით, არასამთავრობო და საერთაშორისო ორგანიზაციებმა ამიერიდან ოკუპირებულ აფხაზეთში რეგისტრირებული იმ არაკომერციული ორგანიზაციების სახელები უნდა გაასაჯაროონ, რომელთა მოზიდვა მათი პროგრამების და პროექტების განსახორციელებლად მოხდება.

ასევე, აუცილებელი გახდება, ოკუპირებული აფხაზეთის, ე.წ. საგარეო საქმეთა სამინისტროსთვის, პროექტების განხორციელების ეტაპების შესახებ ინფორმაციის მიწოდება, მათ შორის, თითოეული აქტივობის დაფიქსირება და დაფინანსების ოდენობის მითითება.