დღეს, თბილისის შერიგების ეკლესიაში, საქართველოსა და სამხრეთ კავკასიაში ევანგელურლუთერული ეკლესიის VII სინოდის მე-2 სხდომა გაიმართა, რომელსაც საქართველოს, აზერბაიჯანისა და გერმანიის ევანგელურ-ლუთერული ეკლესიების მაღალი რანგის სასულიერო პირები ესწრებოდნენ.

ამის შესახებ ინფორმაციას რელიგიის საკითხთა სახელმწიფო სააგენტო ავრცელებს.

მათივე ცნობით, სინოდის სხდომაზე მოისმინეს თბილისის შერიგების ეკლესიის ხელმძღვანელობისა და წარმომადგენლების მოხსენებები, სიახლეები ცალკეული სამრევლოებიდან. დასასრულს კი, დახურულ ფორმატში, განიხილეს 2024 წლის ბიუჯეტის გეგმა.

„ევანგელურ-ლუთერული ეკლესიის ეპისკოპოსის, როლფ ბარაისის მოწვევით, სინოდის სხდომის პირველ ნაწილს დაესწრნენ რელიგიის საკითხთა სახელმწიფო სააგენტოს სტრატეგიული კვლევის, ანალიზისა და რეგიონების სამსახურის უფროსი, ნინო ჭავჭავაძე, უფროსის სპეციალისტი, სერგო ფარულავა და ანალიტიკოსი გიორგი პატაშური.

ნინო ჭავჭავაძე რელიგიის საკითხთა სახელმწიფო სააგენტოს სახელით გულითადად მიესალმა სინოდის წევრებსა და ეკლესიის სტუმრებს. მან ხაზი გაუსვა საქართველოს ევანგელურ-ლუთერული ეკლესიისა და რელიგიის სააგენტოს წარმატებულ თანამშრომლობას ინტერ-რელიგიურ სათათბიროში და საქართველოსა და სამხრეთ კავკასიაში ევანგელურ-ლუთერული ეკლესიის სამღვდელოებასა და მრევლს მომავალ საქმიანობაში წარმატებები უსურვა“,- აღნიშნულია სააგენტოს მიერ გავრცელებულ ინფორმაციაში.