კატარის საგარეო უწყება - ღაზის სექტორში ჰუმანიტარული ზავის კიდევ ორი დღით გახანგრძლივების შესახებ შეთანხმება მიღწეულია

ღაზაში ზავი ორი დღით გახანგრძლივდა, - ამის შესახებ ინფორმაციას კატარის საგარეო საქმეთა სამინისტრო ავრცელებს.

„კატარი აცხადებს, რომ მიმდინარე შუამავლობის ფარგლებში, ღაზის სექტორში ჰუმანიტარული ზავის კიდევ ორი დღით გახანგრძლივების შესახებ შეთანხმება მიღწეულია“, - წერს კატარის საგარეო საქმეთა სამინისტროს წარმომადგენელი, მაჯედ ალ-ანსარი X-ზე (ყოფილი „ტვიტერი“).

ღაზაში ზავის ორი დღით გაგრძელებას „ჰამასიც“ ადასტურებს.

ისრაელსა და „ჰამასს“ შორის მიღწეული შეთანხმების ორი დღით გაგრძელების შესახებ ინფორმაცია ცოტა ხნის წინ ეგვიპტის სახელმწიფო საინფორმაციო სამსახურმაც გაავრცელა.