რუსეთიდან გაკეთებული განცხადებები თუ ვინმეს უხარია, ოპოზიციაა - მდინარაძემ გაახმოვანა ის პოზიცია, რასაც ჩვენ მთელი ამ წლების განმავლობაში ვამბობთ, - ამის შესახებ ჟურნალისტებთან პარლამენტის ვიცე-სპიკერმა არჩილ თალაკვაძემ განაცხადა, რითაც მამუკა მდინარაძის განცხადებაზე რუსი პროპაგანდისტის, მარგარიტა სიმონიანის შეფასებას გამოეხმაურა, რომლის თქმითაც, საქართველო „გასაოცრად ადეკვატურად იქცევა“ სანქციებთან მიმართებით.

თალაკვაძის თქმით, მდინარაძის განცხადება ქვეყნის ინტერესების შესაბამისი იყო და მას გუნდის სრული მხარდაჭერა აქვს.

„რუსეთის ოფიციალური პირების მიერ გაკეთებული განცხადებები თუ ვინმეს უხარია და ახმოვანებს ამას, ესაა რადიკალური ოპოზიცია და მათთან დაკავშირებული მედია. რაც შეეხება მამუკა მდინარაძეს, მან გააკეთა საქართველოს ეროვნული ინტერესების შესაბამისი განცხადება და გაახმოვანა ის პოზიცია, რასაც ჩვენ მთელი ამ წლების განმავლობაში ვამბობთ, რომ ხელისუფლება პასუხისმგებლობით ეკიდება ქვეყნის უსაფრთხოების საკითხებს, ჩვენ შევძელით დაგვეცვა მშვიდობა, ეკონომიკური ზრდის მიღწევა და ევროკავშირში ინტეგრაციის პროგრესის მიღწევა. ეს არის ის სამი ძირითადი საკითხი, რაც დღეს არის უკვე ისტორია და რის გადაწერაც არ შეუძლია არც ერთ განცხადებას, ვის მიერაც არ უნდა იყოს ის გაკეთებული. მდინარაძეს აქვს გუნდის სრული მხარდაჭერა და მისი განცხადება იყო საქართველოს ეროვნულ ინტერებთან შესაბამისი. რუსეთის ოფიციალურ პირების მხრიდან გაკეთებულ განცხადებებზე პირველ სიხარულს რადიკალური ოპოზიცია გამოხატავს, რაც ვფიქრობ, რაღაცაზე მიანიშნებს. რადიკალურ ოპოზიციაში არიან ადამიანები, ვინც პირდაპირ რუსეთის ბიუჯეტიდან იღებენ ხელფასებს და რუსეთთან არიან დაკავშირებული შემოსავლებით. ვინც პირველი ეხმიანება სიხარულით, იმ ადამიანებისთვის არის გამიზნული ეს განცხადებები”, - განაცხადა თალაკვაძემ.

ცნობისთვის, რამდენიმე დღის წინ რუსმა პროპაგანდისტმა მარგარიტა სიმონიანმა სოციალურ ქსელ X-ში (ტვიტერი) „ქართული ოცნების“ ფრაქციის თავმჯდომარის, მამუკა მდინარაძის განცხადება გააზიარა, რომლის თქმითაც, რუსეთის წინააღმდეგ სანქციების დაწესება საკუთარი თავის მოტყუება და სინამდვილეში სანქციების საქართველოს მოქალაქეებისთვის დაწესებას ნიშნავს. სიმოანიანმა სოციალურ ქსელში მდინარაძის აღნიშნული განცხადება შეაფასა და აღნიშნა, რომ საქართველო გასაოცრად ადეკვატურად იქცევა. „კარგი იქნებოდა სომხეთიც რომ ასე იქცეოდეს“,- განაცხადა სიმონიანმა.