აფხაზეთის ავტონომიური რესპუბლიკის მთავრობის ყოფილ თავმჯდომარეს, უმაღლესი საბჭოს ამჟამინდელ წევრ, ვახტანგ ყოლბაიასა და ოკუპირებული აფხაზეთის ე.წ. უშიშროების საბჭოს მდივან, სერგეი შამბას შორის ონლაინ შეხვედრა გაიმართა.

„მე ამის შესახებ ბევრჯერ მისაუბრია და აფხაზურ საზოგადოებაში ბევრს ჩემი პოზიცია არ მოსწონს, მაგრამ მე ყოველთვის ვამბობდი, რომ თუ არის პრობლემა, პირველ რიგში, მის შესახებ საუბარია საჭირო. არ არსებობს ისეთი ხალხი, მეზობლები, ახლობლები რომლებსაც ერთმანეთთან ომი არ ჰქონიათ. მთელი ევროპა ამის ნათელი მაგალითია. ჩვენ მშვიდობიანი თანაცხოვრების შესაძლებლობებს ვეძებთ, რათა ჩვენს შვილებსა და შვილიშვილებს ეს კონფლიქტი არ დავუტოვოთ“, - განაცხადა სერგეი შამბამ.

სერგეი შამბამ აღნიშნა, რომ იგი სახალხო დემოკრატიას დღემდე უჭერს მხარს.

„ამიტომ საჭიროა საუბარი და მშვიდობიანი თანაცხოვრების შესაძლებლობების მოძიება. მაგრამ ეს ბევრ ადამიანს არ ესმის. არც აფხაზეთში და არც საქართველოში, სადაც ჯერ კიდევ არიან აგრესიულად განწყობილნი ადამიანები. მაგრამ მჯერა, რომ დროის გასვლასთან ერთად ესეც გაივლის, მაგრამ ომის შემდეგ დიდი დრო გავიდა, 30 წელი და შეიძლება ურთიერთგაგებისკენ ნაბიჯების გადადგმის დაწყება. მაგრამ ეს ძალიან ნელა ხდება. მე ყოველთვის სახალხო დემოკრატიას ვუჭერდი მხარს და როცა საგარეო საქმეთა მინისტრი ვიყავი, ჩვენი წარმომადგენლები ძალიან ხშირად ხვდებოდნენ ქართველ ოპონენტებს. ეს ერთმანეთის გაგების შესაძლებლობა იყო. ეს მნიშვნელოვანი იყო, რათა პრობლემა მკვდარი წერტილიდან დაძრულიყო. ახლაც ამას ვუჭერ მხარს. ვფიქრობ, რომ კომუნიკაციის სხვადასხვა არხების გამოყენებაა საჭირო. კიდევ ერთხელ გავიმეორებ, ეს ბევრს არ მოსწონს, ჩვენს ხალხებს შორის არსებობს კონფლიქტი, რომელიც ბევრი ისტორიული წინაპირობით და განსაკუთრებით ომის შედეგად დაიბადა. აღნიშნული კონფლიქტის მოსაგვარებლად საჭიროა საუბარი და მომავალში თანაარსებობისთვის ურთიერთგაგების გზების მოძიება“, - აღნიშნა ოკუპირებული აფხაზეთის ე.წ. უშიშროების საბჭოს მდივანმა, სერგეი შამბამ.

აფხაზეთის ავტონომიური რესპუბლიკის მთავრობის ყოფილმა თავმჯდომარემ, უმაღლესი საბჭოს ამჟამინდელმა წევრმა, ვახტანგ ყოლბაიამ შეხვედრის დროს ხაზი გაუსვა იმას, რომ სერგეი შამბა საერთაშორისო ასპარეზზე ცნობილია, როგორც ადამიანი, რომელიც კომპრომისებს და სიტუაციებიდან გამოსვლის პრაგმატულ გზებს ეძებს.

„ჯერ ყველაფერი არ არის დაკარგული, თუ სურვილი იქნება. დღეს, ჩვენ ისეთ მდგომარეობაში ვიმყოფებით, რომელიც საშუალებას არ გვაძლევს, რომ კონკრეტული ურთიერთობებისთვის მზად ვიყოთ, მაგრამ მენდეთ, რომ თბილისი ამას ელოდება. როგორც იცით, ჩვენი საზოგადოებების წარმომადგენლების გარკვეული ნაწილი ხვდება ერთმანეთს, ექიმები, მასწავლებლები და სხვები, როგორც ამბობენ ძალიან ვიწრო ხაზია. თბილისის პოზიციიდან ვამბობ, რომ გადაწყვეტილებების მიღების დროს უფრო გამბედავები უნდა ვიყოთ, რომ იგივე აფხაზ წარმომადგენლებთან კომუნიკაციის გზები გავხსნათ. მე ძალიან მიხარია, როცა ვამბობთ რომ ყველაფერი ჯერ კიდევ არ არის დაკარგული და ჩვენ რაღაც შეიძლება ისევ გამოგვივიდეს“, - განაცხადა ვახტანგ ყოლბაიამ.