მერები, საკრებულოს თავმჯდომარეები, ადგილობრივი თანამდებობის პირები არიან ჩვენი პოლიტიკური გუნდის წარმომადგენლები. მას შეუძლია წავიდეს წალენჯიხაში და მისი პოლიტიკური გუნდის წარმომადგენელი დახვდება, წალენჯიხის მერი, - ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა, რითაც საქართველოს პრეზიდენტის სალომე ზურაბიშვილის განცხადებას გამოეხმაურა, სადაც ის ამბობდა, რომ კამპანიის „ჩვენი ხმა ევროპას“ ფარგლებში, რეგიონებში შეხვედრებისას, მას მუნიციპალიტეტების წარმომადგენლები არ ხვდებოდნენ.

როგორც კობახიძემ აღნიშნა, ბუნებრივია, რომ ეს ადამიანები არ იღებენ მონაწილეობას კოლექტიური „ნაცმოძრაობის“ შესაბამის კამპანიაში.

„ზოგადად, მერები, საკრებულოს თავმჯდომარეები, ადგილობრივი თანამდებობის პირები არიან ჩვენი პოლიტიკური გუნდის წარმომადგენლები. მას შეუძლია წავიდეს წალენჯიხაში და მისი პოლიტიკური გუნდის წარმომადგენელი დახვდება, წალენჯიხის მერი. რაც შეეხება ჩვენი გუნდის წარმომადგენლებს, ისინი რომ „ნაციონალური მოძრაობის“ წარმომადგენელს არ ხვდებიან, ხომ ლოგიკურია?! სალომე ზურაბიშვილი რა კამპანიასაც აწარმოებს, ხომ ვიცით ამის პოლიტიკური მოტივი რაცაა, ეს არის კოლექტიური „ნაცმოძრაობის“ კამპანიების გაგრძელება. სინამდვილეში, ეს ხომ მთლიანად პოლიტიკური კამპანიაა. სისულელეა, ხელმოწერების შეგროვება იმ პირობებში, როცა კომისიის დასკვნა არსებობს და 15 დეკემბერს იქნება მიღებული გადაწყვეტილება. ეს არის კოლექტიური „ნაცმოძრაობის“ ერთ-ერთი მორიგი კამპანია და ამაში როგორ შეიძლება ჩვენი გუნდის წარმომადგენლებმა მიიღონ მონაწილეობა ანუ „ნაცმოძრაობას“ გაუმაგრონ კამპანიები ჩვენი პოლიტიკური გუნდი წარმომადგენლებმა?! ეს იქნება არასწორი და ბუნებრივია, ეს ადამიანები არ იღებენ მონაწილეობას კოლექტიური „ნაცმოძრაობის“ შესაბამის კამპანიაში. ეს არის იაფფასიანი კოლექტიური „ნაცმოძრაობის“ მორიგი კამპანია“,- განაცხადა ირაკლი კობახიძემ.

ცნობისთვის, სალომე ზურაბიშვილმა მრავალპარტიული დემოკრატიის ცენტრის (EECMD) მიერ გამართულ საერთაშორისო კონფერენციაზე გამოსვლისას განაცხადა, რომ ეროვნული თანხმობის მიმართ არის გულგრილობა და მისთვის გაუგებარია, მუნიციპალიტეტის წარმომადგენლები რომ არ ხვდებიან პრეზიდენტს, დიპლომატიური კორპუსის წარმომადგენლებს, როცა კამპანიის „ჩვენი ხმა ევროპას“ ფარგლებში,ისინი ჩადიან ადგილზე.