ამერიკის შეერთებული შტატები ისრაელელებისთვის, რომლებიც დასავლეთ სანაპიროზე პალესტინელებს თავს ესხმიან, სავიზო შეზღუდვის დაწესებას აპირებს.
ამის შესახებ ინფორმაციას ისრაელის მედია ავრცელებს.
მათივე ცნობით, იმის შესახებ, რომ ბაიდენის ადმინისტრაცია შესაბამის აკრძალვაზე მუშაობს ისრაელის პრემიერ-მინისტრს ბენიამ ნეთანიაჰუს გუშინ შემდგარ შეხვედრაზე ამერიკის შეერთებული შტატების სახელმწიფო მდივანმა ენტონი ბლინკენმა აცნობა.
ისრაელის მედიაში გამოქვეყნებული ინფორმაციის თანახმად, დიდი ალბათობით განცხადებაში სავიზო შეზღუდვებთან დაკავშირებით დასახელებული იქნება მხოლოდ ადამიანთა რაოდენობა, ვისზეც აღნიშნული აკრძალვა გავრცელდება და არა მათი სახელები.
სტატიაში განმარტებულია, რომ აღნიშნული გადაწყვეტილება ეფუძნება ამერიკის შეერთებული შტატების ვარაუდს, რომ მსგავსი ანონიმურობა შემაკავებელი მექანიზმის სახით იმუშავებს მათთვის, ვინც შესაძლოა განიხილავდეს პალესტინელებზე თავდასხმას, რომლებსაც არ ეცოდინებათ შეყვანილნი არიან თუ არა შავ სიაში. სავიზო აკრძალვა შესაძლოა უკვე მომავალ კვირას დაწესდეს.
