როცა აღმოაჩინეს, რომ ოლიგარქ კეზერაშვილს „ნაციონალური მოძრაობის“ დაფინანსება გაუჭირდება, პროტესტების ტალღა წამოვიდა - ჩვენ იმ ცვლილებებს ვახორციელებთ, რომელიც პარტნიორების მიერ არის რეკომენდებული, - ამის შესახებ საპარლამენტო უმრავლესობის წევრმა დავით მათიკაშვილმა იურიდიული პირების მიერ პარტიების დაფინანსების აკრძალვასთან დაკავშირებული ცვლილებების კომენტირებისას აღნიშნა.

მათიკაშვილის თქმით, ოპოზიციის პოზიცია ამ საკითხზე აჩვენებს მათ დამოკიდებულებას ევროპული რეკომენდაციების მიმართ.

„ამ კანონპროექტთან მიმართებით ოპოზიციის დამოკიდებულება და კრიტიკა კიდევ ერთხელ ეუბნება საზოგადოებას, თუ როგორ ექცევა და ეპყრობა ოპოზიცია ევროპულ რეკომენდაციებს. პოლიტიკური გემოვნების და სიტუაციის შესაბამისად, ხან არის მისაღები მათთვის ასეთი მიდგომები, როცა საკითხი დეოლიგარქიზაციის თემებს ეხება, ხოლო როცა ცალკეულმა პოლიტიკურმა პარტიებმა აღმოაჩინეს, რომ თუნდაც „ნაციონალურ მოძრაობაში“ მოქმედი სქემით გაუჭირდება ოლიგარქ კეზერაშვილს „ნაციონალური მოძრაობის“ დაფინანსება, პროტესტების ტალღა წამოვიდა და აღმოჩნდა, რომ ეს რადიკალური ოპოზიციისთვის მიუღებელია. ასე რომ, ჩვენ ვიზიარებთ ჩვენი ევროპელი პარტნიორების რეკომენდაციებს და ის ცვლილებები შეგვაქვს კანონმდებლობაში, რომელიც ამ მოცემულობით არის მათი მხრიდან რეკომენდებული,“ - განაცხადა მათიკაშვილმა.

ინფორმაციისთვის, „მოქალაქეთა პოლიტიკური გაერთიანებების შესახებ" კანონში დაგეგმილი ცვლილებებით, რომელიც ფრაქცია "ქართული ოცნების" დეპუტატების მიერ არის ინიცირებული, პოლიტიკური პარტიები იურიდიული პირებისგან ფინანსური და მატერიალური შემოწირულებების მიღებას ვეღარ შეძლებენ.

ამავე პროექტით, წინა წლის მთლიანი შიდა პროდუქტის 0.05%-დან 0.04%-მდე მცირდება პარტიის მიერ წლის განმავლობაში გაწეული ხარჯების დასაშვები საერთო ოდენობის ზედა ზღვარი.

როგორც "ქართული ოცნება" განმარტავს, აღნიშნული პროექტის მიღების შემთხვევაში, საქართველო გაითვალისწინებს ვენეციის კომისიის მიერ 2023 წლის 12 ივნისს გამოქვეყნებულ რეკომენდაციას „დეოლიგარქიზაციის შესახებ", სადაც მითითებულია იურიდიული პირებისთვის პოლიტიკური პარტიების დაფინანსების შესაძლებლობის აკრძალვა.