ღაზაში ადამიანების ტანჯვა აუტანელია, - ამის შესახებ წითელი ჯვრის საერთაშორისო კომიტეტის (ICRC) პრეზიდენტმა, მირიანა სპოლიარიჩმა განაცხადა.

„მე ღაზაში ჩავედი, სადაც ხალხის ტანჯვა აუტანელია. მიუღებელია, რომ მშვიდობიან მოსახლეობას გადასაადგილებლად უსაფრთხო ადგილი არ აქვს და სამხედრო ალყის პირობებში ადეკვატური ჰუმანიტარული დახმარების გაწევა შეუძლებელია“, - წერს წითელი ჯვრის საერთაშორისო კომიტეტის პრეზიდენტი X-ზე (ყოფილი „ტვიტერი“).

სპოლიარიჩმა აღნიშნა, რომ წითელი ჯვრის საერთაშორისო კომიტეტი მომავალ ჰუმანიტარულ შეთანხმებებს მხარს დაუჭერს.

„მძევლები უნდა გათავისუფლდნენ და წითელი ჯვრის საერთაშორისო კომიტეტს მათი მონახულების საშუალება უნდა მიეცეს. როგორც ნეიტრალური აქტორი, წითელი ჯვრის საერთაშორისო კომიტეტი მზად არის, რომ მომავალ ჰუმანიტარულ შეთანხმებებს მხარი დაუჭიროს“, - აღნიშნა სპოლიარიჩმა.