იურისტთა და უფლებადამცველთა ღია საზოგადოების, Первый отдел-ის ინფორმაციით, რამდენიმე კვირის წინ საქართველოში გაუჩინარებული რუსი აქტივისტი, რაფაილ შეპელევი ნიჟნი ტაგილის წინასწარი დაკავების იზოლატორში იმყოფება.

უფლებადამცველები აცხადებენ, რომ შეპელევს ბრალად ედება ტერორისტული ორგანიზაციის საქმიანობაში მონაწილეობა, რაც თავისუფლების 10-დან 20 წლამდე აღკვეთას ითვალისწინებს, და ტერორიზმის გამართლება, რაც 5-დან 7 წლამდე თავისუფლების აღკვეთას ითვალისწინებს.

„შეპელევი რუსეთის უშიშროების ძალების პროვოკაციის მსხვერპლი გახდა. ის თბილისიდან ცხინვალის რეგიონში მოტყუებით გადაიყვანეს, იქ დააკავეს, ვლადიკავკაზში გადაიყვანეს, ადმინისტრაციული პატიმრობა შეეფარდა, რა დროსაც ბრალი წაუყენეს სისხლის სამართლის საქმეზე და აღკვეთის ღონისძიება შეუფარდეს, შემდეგ კი სისხლის სამართლის საქმის წინასწარი გამოძიების ადგილზე, ნიჟნი-ტაგილის წინასწარი დაკავების იზოლატორში გაგზავნეს“, - აცხადებენ Первый отдел-ის უფლებადამცველები.