ღაზას სექტორში მიმავალი ჰუმანიტარული დახმარების შესამოწმებლად ისრაელი ომის დაწყებიდან პირველად გახსნის კერემ შალომის სასაზღვრო პუნქტს. ამის შესახებ ინფორმაციას გამოცემა The Times of Israel ისრაელელ მაღალჩინოსანზე დაყრდნობით ავრცელებს.

მედიის ინფორმაციით, მოსალოდნელია, რომ გადაწყვეტილება მოქმედებაში რამდენიმე დღეში მოვა და განკუთვნილია იმისთვის, რომ ღაზას სექტორში ჰუმანიტარული დახმარების მიწოდება გაიზარდოს.

ამჟამად ისრაელი ისრაელ-ეგვიპტის საზღვარზე მდებარე ნიცანას პატარა სასაზღვრო პუნქტზე ამოწმებს ყველა სატვირთო მანქანას, სანამ ისინი ეგვიპტესა და ღაზას სექტორს შორის მდებარე რაფაჰის სასაზღვრო პუნტისკენ გაემგზავრებიან.

ინფორმაციაში აღნიშნულია, რომ ისრაელი კერემ შალომის სასაზღვრო პუნქტის ინფრასტრუქტურას სატვირთო მანქანების გადასამოწმებლად გამოიყენებს, მაგრამ ღაზაში შესასვლელად მათ მაინც რაფაჰის სასაზღვრო პუნქტის გავლა მოუწევთ.