საქართველოს დედაქალაქისა და რეგიონების სკოლებში პროექტი „ჩვენი ჯარი“ გრძელდება და სამხედრო მოსამსახურეების სკოლებში მოსწავლეებთან ინფორმაციული შეხვედრები წარმატებით მიმდინარეობს,- ამის შესახებ ინფორმაციას საქართველოს თავდაცვის სამინისტრო ავრცელებს.

მათივე ცნობით, საქართველოს თავდაცვის ძალების წვრთნებისა და სამხედრო განათლების სარდლობის წარმომადგენლები ქალაქ რუსთავის, მე-18 საჯარო სკოლას ესტუმრნენ და მაღალი კლასების მოსწავლეებს თავდაცვის ძალების შესახებ პრეზენტაცია წარუდგინეს.

უწყების განმარტებით, სამხედრო მოსამსახურეებმა მათ თავდაცვის ძალების ამოცანების, სტრუქტურის, თავდაცვის სფეროში მიმდინარე რეფორმების, ჯარში მოხვედრისა და სამსახურის, სამხედრო განათლების მიღებისა და კარიერული წინსვლის შესაძლებლობების, ასევე სხვა აქტუალური საკითხების შესახებ ინფორმაცია მიაწოდეს. მოგვიანებით ჯარისკაცებმა ბავშვების ყველა შეკითხვას ამომწურავი პასუხები გასცეს.

თავდაცვის სამინისტროს ინფორმაციით, „ჩვენი ჯარი“ რამდენიმე წელია თავდაცვის, ასევე, განათლებისა და მეცნიერების სამინისტროს თანამშრომლობით ხორციელდება და ახალგაზრდებში ჯარის პოპულარიზაციასა და ინსტიტუციის მიმართ ცნობიერების ამაღლებას ისახავს მიზნად. მათივე განმარტებით, 2023-2024 სასწავლო წელს პროექტი უფრო ფართო მასშტაბით სრულდება და სამხედრო მოსამსახურეების ვიზიტები საჯარო სკოლების გარდა, სხვადასხვა რეგიონში, კერძო სკოლებსა და უმაღლეს სასწავლებლებშიც იგეგმება.