ეროვნულ-დემოკრატიული ინსტიტუტის (NDI) კვლევის შედეგების თანახმად, გამოკითხულთა უმრავლესობა პარლამენტის საქმიანობას საშუალოდ ან კარგად აფასებს.

კერძოდ, კითხვაზე, როგორ შეაფასებდით პარლამენტის საქმიანობას, რესპონდენტების 44% ამბობს, რომ საშუალოდ. საკანონმდებლო ორგანოს მუშაობას ცუდს უწოდებს 34%; 13% ამბობს, რომ პარლამენტი კარგად მუშაობს; 8%-მა კითხვაზე პასუხი არ იცის, 1% კი პასუხზე უარს ამბობს.

კვლევის თანახმად, აღნიშნული სტატისტიკის სხვადასხვა კატეგორიის მიხედვით განაწილება აჩვენებს, რომ თბილისელები, ახალგაზრდები, კაცები, ოპოზიციის მხარდამჭერები პარლამენტს შედარებით უფრო კრიტიკულად აფასებენ. კვლევის თანახმადვე, ოპოზიციის თითქმის ნახევარი და გადაუწყვეტელთა უმრავლესობა პარლამენტის საქმიანობას კარგად ან საშუალოდ აფასებს.

აღნიშნული ანგარიში 14 ოქტომბრიდან 4 ნოემბრამდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირი გამოკითხვის შედეგებს ემყარება (ოკუპირებული ტერიტორიების გამოკლებით). ოქტომბერში ჩატარებული გამოკითხვა სულ 2,068 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2,2 პროცენტია.