თბილისის მერიის მუნიციპალური სერვისების განვითარების სააგენტოს პროექტმა MS Taxi, საქართველოს ICT ბიზნეს საბჭოს მე-13 რეგიონულ კიბერუსაფრთხოებისა და IT ინოვაციების კონფერენციაზე, ყველაზე გამოყენებადი ელექტრონული სერვისის საკონკურსო ნომინაციაში გაიმარჯვა.

ამის შესახებ ინფორმაციას თბილისის მერია ავრცელებს.

მუნიციპალური სერვისების განვითარების სააგენტოს ხელმძღვანელის, გიორგი მარგებაძის თქმით, სააგენტო აქტიურად მუშაობს ინოვაციების მიმართულებით, რათა მოქალაქეებს არაერთი პრაქტიკული ელექტრონული სერვისი შესთავაზოს.

„მოხარულები ვართ, რომ ამ ნომინაციაში გავიმარჯვეთ. ჩვენი სააგენტო აქტიურად მუშაობს ინოვაციების მიმართულებით, რათა მოქალაქეებს არაერთი პრაქტიკული ელექტრონული სერვისი შევთავაზოთ. კონფერენციაზე მონაწილეობა მივიღეთ პანელურ სესიაშიც და ჩვენი პროექტები პროფესიულ წრეებს წარვუდგინეთ“, - განაცხადა მუნიციპალური სერვისების განვითარების სააგენტოს ხელმძღვანელმა, გიორგი მარგებაძემ.

ინფორმაციის თანახმად, მუნიციპალური სერვისების სააგენტოს ელექტრონული სერვისები რამდენიმე პროექტს აერთიანებს, რომლის მიზანია, როგორც თბილისის, ასევე რეგიონების მოსახლეობამ სახლიდან გაუსვლელად შეძლოს სასურველი მომსახურების მიღება. სააგენტო აღნიშნული სერვისების განვითარებაზე ყოველდღიურ რეჟიმში მუშაობს.