საქართველოს პრეზიდენტის სალომე ზურაბიშვილის განცხადებით, საქართველოსთვის კანდიდატის სტატუსის მინიჭების შესახებ უარყოფითი პასუხით „რუსეთი ისარგებლებს, საქართველოს ნაცრისფერ ზონად ჩათვლის და ამას პროპაგანდისთვის გამოიყენებს”.

ამის შესახებ ზურაბიშვილმა ჩეხეთში ვიზიტის დროს „რადიო თავისუფლების“ პრაღის ოფისთან მიცემულ ინტერვიუში განაცხადა.

კითხვაზე რა შედეგი ექნება ევროპულის საბჭოს მიერ საქართველოსთვის კანდიდატის სტატუსის მინიჭების შესახებ უარყოფითი პასუხს, სალომე ზურაბიშვილმა უპასუხა, რომ ეს ძალიან ცუდი იქნება.

„ძალიან ცუდი. ყოველგვარი კითხვის ნიშნის გარეშე. ეს საზოგადოებაში ძალიან დიდ იმედგაცრუებას გამოიწვევს, განსაკუთრებით ევროკომისიის რეკომენდაციის შემდეგ. ვფიქრობ, ახლა ყველა დარწმუნებულია იმაში, რომ პასუხი აუცილებლად დადებითი იქნება. მაგრამ ვფიქრობ არაფერი შეიძლება ჩაითვალოს შესრულებულად, სანამ ის არ გაკეთდება“, - განაცხადა სალომე ზურაბიშვილმა.