ეს გეოპოლიტიკური ფანჯარა, ფაქტობრივად, ბეწვზე გავიარეთ - ქართველმა ხალხმა რუსულ ხელისუფლებას ეს გამარჯვება გამოგლიჯა, მაგრამ იმისთვის რომ წინ ვიმოძრაოთ, გარდამტეხი პოლიტიკური ცვლილებები გვჭირდება, - ამის შესახებ პარტია "ლელოს" დეპუტატმა, სალომე სამადაშვილმა ჟურნალისტებთან საუბრისას განაცხადა.

მან მთელ საქართველოს ევროკავშირის კანდიდატი ქვეყნის სტატუსის მოპოვება მოულოცა.

„ჩვენ უახლოეს თვეებში ვაპირებთ, ჩვენს მოქალაქეებს ძალიან კარგად ავუხსნათ, რატომ არის დღეს კიდევ უფრო მნიშვნელოვანი, რომ ჩვენ ვირწმუნოთ საკუთარი ძალების, ვირწმუნოთ იმის, რომ ამ ქვეყანას მართლა აქვს ევროპული მომავალი და როგორ შეიძლება ამ მომავლის უზრუნველყოფა. ამ მიზნით ვაპირებთ, რომ ჩვენს მთავარ პოლიტიკურ მოკავშირეს და ამ ქვეყნის ევროპული მომავლის მთავარ მოკავშირეს, ქართველ ხალხს ვესაუბროთ ძალიან ბევრი. ჩვენ ვნახეთ, რომ ეს გეოპოლიტიკური ფანჯარა, ფაქტობრივად, ბეწვზე გავიარეთ. „ქართული ოცნების“ მიერ საკუთარ მთავარ მოკავშირედ გამოცხადებული ვიქტორ ორბანის ევროპული საბჭოს სხდომიდან გაგდება გახდა საჭირო იმისთვის, რომ ეს დღე დამდგარიყო. ეს ძალიან ნათელი ნიშანი უნდა იყოს საქართველოს ყველა მოქალაქისთვის. რუსული ხელისუფლების პირობებში, ქართველმა ხალხმა ამ ხელისუფლებას ეს გამარჯვება გამოგლიჯა, მაგრამ იმისთვის რომ წინ ვიმოძრაოთ, ჩვენ გვჭირდება გარდამტეხი პოლიტიკური ცვლილებები”, - განაცხადა სამადაშვილმა.