რადიკალურმა ოპოზიციამ ამ პერიოდის განმავლობაში უკიდურესად დესტრუქციული პოზიცია დაიკავა, ამიტომ მათ დღეს ძალიან გაუჭირდათ პარლამენტში მოსვლა და, რა თქმა უნდა, ამ ზეიმზეც შემოერთება, - ამის შესახებ "ქართული ოცნების“ დეპუტატმა ირაკლი ქადაგიშვილმა განაცხადა, რითაც გამოეხმაურა ოპოზიციის ნაწილის მიერ ევროკავშირის კანდიდატი ქვეყნის სტატუსის მიღების ცალკე აღნიშვნას.

„იმედი ვიქონიოთ, რომ მომავალ დღეებში მაინც გადალახონ ეს კომპლექსი და საქართველოს შემოუერთდნენ ამ გზაზე“, - აღნიშნა ქადაგიშვილმა.

ამასთან, ქადაგიშვილის თქმით, პრეზიდენტი, სალომე ზურაბიშვილი დღეს საზეიმო სცენაზე იდგებოდა, მას რომ დაეცვა ის პოზიცია რა მანდატითაც ხალხმა აირჩია.

„კარგი იქნებოდა, რომ პრეზიდენტს დაეცვა ის პოზიცია, რა მანდატითაც ხალხმა აირჩია და დღეს, ისიც იდგებოდა სცენაზე. პრეზიდენტმა თვითონ არ მისცა თავის თავს საშუალება სცენაზე მდგარიყო, სამწუხაროდ“,- განაცხადა ქადაგიშვილმა.