ისრაელის თავდაცვის ძალების მიერ ღაზის ჩრდილოეთში, ჯაბალიაში განხორციელებული საჰაერო თავდასხმის შედეგად მინიმუმ 24 ადამიანი დაიღუპა, - ინფორმაციას CNN-ი „ჰამასის“ მიერ კონტროლირებად ჯანდაცვის სამინისტროზე დაყრდნობით ავრცელებს.

ჯანდაცვის სამინისტროს გენერალურმა დირექტორმა, მუნირ ალ-ბურშმა CNN-ს განუცხადა, რომ დაშავებულია 90 ადამიანი, ბევრი კი, სავარაუდოდ, ნანგრევების ქვეშაა მოყოლილი.

„საჰაერო დარტყმა ალ-შიჰაბების ოჯახის სახლზე, სადაც დევნილი ოჯახები იყო განთავსებული, დღეს დილით განხორციელდა. დაღუპულთა უმრავლესობა ქალები და ბავშვები არიან“, - აღნიშნა ჯანდაცვის სამინისტროს გენერალურმა დირექტორმა.

შეგახსენებთ, „ჰამასის“ მიერ კონტროლირებად ხელისუფლებაში აცხადებენ, რომ ღაზაში ისრაელის თავდასხმებს 7 ოქტომბრის შემდეგ, დაახლოებით, 19 000 ადამიანი ემსხვერპლა.